मकवानपुरमा डेंगु संक्रमित ५ सय नाघे

मकवानपुर- मकवानपुर जिल्लामा डेंगु संक्रमितको सङ्ख्या ५ सय नाघेको छ । लामखुट्टेको टोकाईबाट हुने डेंगु संक्रमण बढेसँगै अस्पतालमा बिरामीको चाप समेत बढेको छ ।

स्वास्थ्य कार्यालय मकवानपुरका अनुसार मकवानपुर जिल्लामा साउन यता ५ सय ५८ जनामा डेंगु संक्रमण पुष्टि भएको छ । स्वास्थ्य कार्यालय मकवानपुरका सूचना अधिकारी लक्ष्मण घिमिरेले संक्रमितको सङ्ख्या बढिरहेकोले आवश्यक सतर्कता अपनाउन आग्रह गरे । मकवानपुर जिल्लाको हेटौंडा उपमहानगरपालिका-४ र ५ नम्बर वडामा सबैभन्दा बढी संक्रमितहरू रहेको स्वास्थ्य कार्यालयले जनाएको छ ।

---

गत साउनको तेस्रो सातासम्म २८ जनामा देखिएको डेंगु ज्वरोका संक्रमितहरूको संख्या हाल ५ सय ५८ जना पुगेको छ । हेटौंडाका ४ र ५ नम्बर वडाका बढी ग्यारेजहरू धेरै रहेको तथा जनघनत्व समेत बढी भएका कारण यहाँ बढी संक्रमितहरू रहेको कार्यालयले जनाएको छ ।

विद्यालयहरूको चौरमा झाडी भएका कारण स्कुले बालबालिकाहरूलाई समेत डेंगुको संक्रमण हुने जोखिम बढेको छ ।

डेंगुको कारण कसैको पनि ज्यान नगएको तर अस्पताल र मेडिकलहरूमा डेंगु बिरामीको चाप बढेको घिमिरेले बताए ।

जिल्लाको सरकारी अस्पताल हेटौंडा अस्पतालमा पछिल्ला दिनहरूमा डेंगुका लक्षणसहित ज्वरोका बिरामीहरूको संख्या पनि ह्वात्तै बढेको अस्पतालका मेडिकल सुपेरिटेण्डेन्ट डाक्टर रामचन्द्र सापकोटाले जानकारी दिए ।

उनले अस्पतालमा दैनिक एक सयभन्दा माथि ज्वरोका बिरामीहरू उपचारका लागि आउने गरेकाे बताए । उनका अनुसार सीमित किट रहेकाले डेंगु परीक्षणका लागि उनीहरूलाई बाहिरी मेडिकल पठाउनु पर्ने बाध्यता रहेकाे छ । जिल्लामा सरकारी अस्पताल, स्थानीय पालिकाहरू स्थित स्वास्थ्य संस्था तथा बजार क्षेत्रका निजी स्वास्थ्य क्लिनिकहरूमा डेंगु परीक्षण हुँदै आएको छ ।

तर, स्थानीय तहले डेंगु नियन्त्रणका लागि खासै पहल कदमी चालेको छैन । एक महिनाअघि केही स्थानमा हेटौंडा उपमहानगरपालिकाले लामखुट्टे नष्ट गर्नका लागि स्प्रे गरेको भए पनि हाल नगरपालिकाले त्यसतर्फ चासो नै दिएको छैन । विभिन्‍न अनावश्यक निर्णय गरेका कारण विवादमा मुछिएको तर स्थानीयवासीको स्वास्थ्य सवालमा भने नगरपालिकाले सरोकार नराखेजस्तो व्यवहार गरेको भन्दै स्थानीयले गुनासो गरेका छन् ।

गएको आर्थिक वर्ष २०७८/०७९ मा जिल्लामा १९५ जनामा मात्र संक्रमण देखिएको थियो । तर, चालू आर्थिक वर्षको दुई महिनामै उक्त संख्या झण्डै तेब्बरले भएको छ । डेंगु संक्रमण फैलाउने लामखुट्टेले दिउँसो टोक्ने भएकाले घर, विद्यालय तथा कार्यालय वरपर लामखुट्टे बस्‍न झाडीहरू तथा जमेको पानीहरू हटाउन स्वास्थ्यकर्मीहरूले आग्रह गरेका छन् ।