रानाको टिकट खोसियो, कमल थापा सूर्य चिह्नबाट चुनाव लड्‍ने भएपछि एमाले कार्यकर्ता आक्रोशित

मकवानपुर - राप्रपा नेपालका केन्द्रीय अध्यक्ष कमल थापा अन्ततः मकवानपुरको प्रतिनिधि सभा १ बाट सुर्य चिह्न लिएर चुनावमा जाने पक्का भएको छ । 

गत स्थानीय तहको निर्वाचनमा हेटौँडा उपमहानगरपालिकाको मेयरको चर्चामा रहेको एमाले नेता रामेश्वर रानालाई संघीय निर्वाचनमा टिकट पक्का गरी ब्याक हुन लगाइएको थियो । एमालेका सन्त नेता मानिने रानाले खासै विरोध नगरे पनि उनका समर्थकहरूले संघीय निर्वाचनमा पार्टीबाट घात हुनसक्ने भन्दै व्यापक विरोध गरेका थिए । अन्तत त्यो सत्य सावित भएको छ ।

---

२१ गते एमालेले मकवानपुरबाट ६ जना उम्मेदवारहरूमा नेताहरूको नाम सार्वजनिक गर्‍यो । तर, ति नामको मसी सुक्न नपाउँदै केही घण्टामै केन्द्रीय कमिटीको बैठकले मकवानपुर १ बाट रानाको नाम हटाएर राप्रपा नेपालका अध्यक्ष थापाको नाम राखिएपछि मकवानपुरे एमालेजनहरूले सामाजिक सञ्जालमा आक्रोश पोखेका छन् । 

स्थानीय चुनावमा रानालाई ब्याक गराइएकै कारण हेटौँडा उपमहानगरपालिकामा एमालेको हार व्यहोर्नु परेको विश्लेषण गर्ने गरिएको छ । प्रतिनिधि सभाको निर्वाचनमा मकवानपुर १ बाट उम्मेदवार बनाउने तयारी हुँदै आएको थियो । 

दसैँताका राप्रपा अध्यक्ष थापाले केन्द्रमा एमाले अध्यक्ष केपी शर्मा ओलीसँग आफ्नो सहमति भइसकेको भन्दै गृह जिल्ला मकवानपुरमा एमालेको गुणगान गाउन थालेपछि एमालेजनमा शंका उब्जिएको थियो ।

दसैँमा एमाले मकवानपुरले आयोजना गरेको शुभकामना आदनप्रदान कार्यक्रममा राप्रपा अध्यक्ष थापा उनका भाइ गणेश थापालगायत दर्जनौँ कार्यकर्तासँगै पार्टी कार्यालय पुगेपछि एमालेजनमा झनै शंका बढेको थियो । 

नेकपा एमालेका केन्द्रीय सदस्य तथा मकवानपुर इन्चार्ज रानाको टिकट खोसेर थापालाई सूर्य चिन्हबाट चुनाव लड्ले एमाले अध्यक्ष ओलीसँग सहमति भएपछि रानाको टिकट खोसिएको हो ।

थापा शाही शासनका अन्तिम गृहमन्त्री हुन् । नेकपा एमालेको बागमती प्रदेश इन्चार्ज काशीनाथ अधिकारीले थापा सूर्य चिह्न लिएर चुनाव लड्ने निश्चित भएको बताए ।

एमाले मकवानपुरले थापाको जनमत नभएको भन्दै उनलाई उम्मेदवार बनाउन नहुने टिप्पणी गर्दै आएको छ ।

यसैबारे एमाले कार्यकर्ताहरू यसअघि पार्टी अध्यक्ष ओली कहाँ डेलिगेसन नै गएको थियो । तैपनि अन्तिम समयमा ओलीले थापालाई आफ्नो पार्टीबाट उम्मेदवार नबनाउने बचन दिएको बताइएको थियो । अन्ततः थापा एमाले चिन्हबाट उम्मेदवार पक्का भएपछि कार्यकर्ताहरू उनलाई जिताउनको लागि नलाग्‍ने बताइरहेको छन् । 

यता कमल थापाले आफ्नो जीवनकालमा अन्तिम पटक चुनावी मैदानमा आएको भन्दै सहानुभूतिको मत माग्दै हिँडेका छन् । एमाले मकवानपुरले पार्टीको निर्णयलाई स्वीकार गरेर चुनावी मैदानमा जाने बताएको छ ।