हेटौंडाकाे भैरवडाँडा क्षेत्रमा देखा पर्‍याे बाघ, नियन्त्रण गर्न स्वचालित क्यामेरा जडान

मकवानपुर- मकवानपुरकाे हेटौंडा उपमहानगरपालिका वडा नं. १ भैरवडाँडा क्षेत्रमा आइतबार बाघ देखा परेकाे थियाे । आइतबार २ वटा डमरुसहित स्थानीयले बाघ देखेका थिए । आइतबार नै स्थानीयकाे २ वटा बाख्रा खाएको बाघ सोमबार पनि त्यस क्षेत्रमा देखिएपछि प्रहरीलाई खबर गरेका थिए ।

साेमबार समेत देखा परेको बाघको खोजी कार्य थालिएको छ । मंगलबारबाट जिल्ला प्रहरी कार्यालय मकवानपुर र जिल्ला वन कार्यालयको संयुक्त टोलीले भैरवडाँडा क्षेत्रमा बाघको खोजी सुरु गरेको हो । यसैगरि भैरवडाँडाकाे वन क्षेत्रमा बाघ समात्न स्वचालित ट्र्यापिङ क्यामेरा जडान गरिएको छ। बुधबार डिभिजन वन कार्यालय हेटौंडा र हेटौंडा उपमहानगरपालिका १ नम्बर वडा कार्यालयले भैरवडाँडास्थित वन क्षेत्रमा चारवटा ट्र्यापिङ क्यामेरा जडान गरेको हो । 

---

‘हामीले जडान गरेको क्यामेरा दुई दिनपश्चात् हेर्नेछौं । त्यस क्षेत्रमा बाघ भए क्यामेरामा देखिनेछ,’ वडाध्यक्ष सविन न्यौपानेले भने । क्यामेराले त्यसक्षेत्रको गतिविधि सूक्ष्म रूपमा कैद गर्ने र बाघको आक्रमणबाट स्थानीयलाई जोगाउन आवश्यक पहल गर्न सहज हुने न्यौपानेले बताए। 

आइतबार बिहान साढे ११ बजे स्थानीयकाे एउटा बाख्रा र एउटा खसी खाएकाे बाघ सोमबार साँझ पनि भैरवडाँडा क्षेत्रमा देखिएकाले सोही स्थानमा क्यामेरा जडान गरिएको राष्ट्रिय प्रकृति संरक्षण कोषका प्राविधिक रमेश दराईले बताए । 

जिल्ला प्रहरी कार्यालय मकवानपुरले सो क्षेत्रमा बाघ देखिएकाले स्थानीयलाई सतर्कता अपनाउन आग्रह गरेको छ । जंगल बाक्लो रहेकोले बाघ कहीकतै गएर बसेको हुनसक्ने मकवानपुर प्रहरी प्रवक्ता टेकबहादुर कार्कीले बताए । बाघको खोजी कार्य भइरहेकाले सतर्कता अपनाउन समेत जिल्ला प्रहरी कार्यालय मकवानपुरले आग्रह गरेकाे छ ।