मकवानपुरमा सान्त्वना खाेज्दै आनन्दराम पराजुली

मकवानपुर- सत्ता गठबन्धनकाे तर्फबाट मकवानपुर क्षेत्र नं. १ प्रदेश सभा (ख) का उम्मेदवार आनन्दराम पराजुली मकवानपुरमा सान्त्वना खाेज्दै घरदैलाे कार्यक्रममा व्यस्त छन् । नेपाली काँग्रेस मकवानपुरका पूर्व नगर सभापति आगामी निर्वाचनमा प्रदेश सभा (ख) सदस्यमा विजयी हुने उत्साहका साथ चुनावी प्रचारप्रसारमा घरघर पुगेर मतदाताकाे आशीर्वाद लिइरहेका छन् ।

मतदाता शिक्षा दिन नसकेकै कारण २०७४ सालकाे स्थानीय तह निर्वाचनमा हेटाैंडा उपमहानगरपालिकाकाे मेयरमा थोरै मतले पराजित भएका कांग्रेस नेता पराजुली यसपटक जनताकाे प्रतिनिधि चुनिनेमा विश्वस्त छन् । अघिल्लाे स्थानीय तहकाे निर्वाचनमा हेटाैंडा उपमहनागरपालिकामा नेकपा माओवादी केन्द्रसँगकाे चुनावी तालमेल भएकाेमा मतदाता शिक्षाकाे कमीले उनी पराजित भएका थिए । मकवानपुरे जनतामा परिचित उनी अहिले हेटौंडा उपमहानगरकाे १२ वडाकाे प्रतिनिधित्व रहने प्रदेश सभामा उम्मेदवार भएर प्रचारप्रसारमा गरिरहेका छन् ।

---

गत स्थानीय निर्वाचनमा हेटौंडा उपमहानगरपालिकाको मेयरकै टिकट पाउनसक्ने नेताको रूपमा गनिएका उनी गठबन्धनका कारण नेकपा (एस) को भागमा परेपछि चित्त बुझाउँदै गठबन्धनलाई जिताउने अभियानमा सक्रिय रहेका थिए । अहिले कांग्रेसले प्रदेश सभा सदस्य पदको टिकट दिएपछि उनीमाथि ‘न्याय’ भएको र ‘जित सुनिश्चित’ रहेको भन्ने मतदाताहरू पनि रहेका छन् ।

‘अघिल्लो पटक हेटौंडा उपमहानगरपालिकाको मेयर पदमा चुनाव लडेकाले पनि मलाई यो पटक धेरै सहज भएको छ,' उनी भन्छन्, ‘मतदाताको साथ, सहयोग, सद्भाव र हौसलाले थप उर्जा मिलेको छ । माहौल निकै राम्रो छ, गठबन्धनको जित सुनिश्चित भैसकेको छ ।’ उनलाई अहिले कांग्रेससहित गठबन्धनमा रहेका दल नेकपा माओवादी केन्द्र, नेकपा (एस), जनमोर्चा लगायतको दलको पनि साथ रहेको छ ।

उनी गठबन्धन बाहिर रहेका पार्टीका नेता कार्यकर्ताको पनि रोजाई बनिरहेका छन् । ‘म कांग्रेसको कार्यकर्ता हुँ । म निरन्तर पार्टीलाई मजबुत बनाउन र यहाँका जनताको सुखदुःखमा साथै रहेको छु,' उनले भने । पराजुलीले शुक्रबार हेटौंडा ५ र २ नम्बर वडाको घरदैलाे अभियानका क्रममा पनि मतदाताको धेरै साथ र सहयोग पाएको बताए । पटक-पटक चुनाव जितेको एमालेका उम्मेदवारहरूले कुनै एजेण्डा नै नभएपछि अनेक अफवाह र भ्रम फैलाइरहेका उनले बताए ।

कांग्रेसकै पनि एउटा समूह तपाईंको विरुद्धमा छ भनिन्छ नि ? भन्ने प्रश्नमा उनले यो सब विरोधीले चलाएको अनावश्यक झुटो हल्ला मात्र भएको बताए । ‘कांग्रेस ठूलो पार्टी हो, यहाँ एकसेएक नेताहरू रहेका छन् । टिकटका लागि मसहित अन्य नेताहरूको पनि दाबेदारी थियो । दाबेदारी हुनु स्वभाविक पनि हो,' उनले भने, ‘टिकट मेरो नाममा आयो । अहिले सबै नेताहरू मकवानपुरमा गठबन्धनका उम्मेदवारलाई जिताउने अभियानमा लागेका छौं ।

एकजनाले मात्रै हार्दा पनि गठबन्धनप्रति विश्वास नहुने, पार्टीमै समस्या आउने हुनसक्छ भन्ने विषयमा हामी क्लियर छौं,’ गठबन्धन र कांग्रेसभित्र कुनै समस्या नरहेको उनले प्रष्ट पारे ।