पार्टी होइन मत फेर्नुस् : लामिछाने

हेटौंडा- राष्ट्रिय स्वतन्त्र पार्टीका सभापति रवि लामिछानेले आगामी मंसिर ४ गते हुने निर्वाचनमा पार्टी होइन मत फेर्न मतदातालाई आग्रह गरेका छन् ।

चुनावी प्रचारप्रसार कार्यक्रम अन्तर्गत हेटौंडा आएका लामिछानेले ठूला राजनीतिक दलको झुटा आश्वासन धेरै हेरिएको भन्दै अब मत फेर्ने समय आएको बताए ।

---

राष्ट्रिय स्वतन्त्र पार्टी मकवानपुरको आयोजनामा मंगलबार हेटौंडामा भएको सभालाई सम्बोधन गर्दै लामिछानेले भने, ‘वर्षौंदेखि लागेको पार्टी छोड्नुस् भन्दिनँ । यसपटक निर्वाचनमा पार्टी होइन मत फेरेर हेर्नुस् ।’ देशमा भएको भ्रष्टाचार अन्त्य गर्न आवश्यक रहेकाले पनि आफू राजनीतिमा आएको उनकाे भनाइ छ ।

वैदेशिक रोजगारीमा गएका युवाहरूलाई 'नेपाल फर्क' अभियान नै सञ्चालन गरेर काम गरी खाने वातावरण सृजना गर्ने योजनासहित राष्ट्रिय स्वतन्त्र पार्टी अगाडि बढेको लामिछानेले जानकारी दिए ।

‘काम गर्न चुनाव जित्नै पर्दैन । समस्या पर्दा सबैलाई सहयोग गर्न तयार छु । समाजमा चेलिबेटीहरूमा भएको विभेद अन्त्य गर्न र अत्याचार गर्न सधैं आवाज उठाइरहेको छु,’ लामिछानेले भने । उनले आगामी निर्वाचनमा राष्ट्रिय स्वतन्त्र पार्टीले सबैभन्दा बढी महिला उम्मेदवार उठाएको जानकारी गराउँदै आफूले हात हालेको काम अधुरो नछोडेको र देशमा भएका समस्याहरू स्थायी रूपमा समाधान गर्न तयार रहेको बताए ।