गठबन्धनले जनताको मताधिकारमा कुठाराघात गर्‍याे : डोरमणि पौडेल

मकवानपुर- बागमती प्रदेशका प्रथम मुख्यमन्त्री डोरमणि पौडेलले गठबन्धनले जनताको मत हाल्न पाउने अधिकारलाई कुठाराघात गरेको बताएका छन् । आफ्नो पार्टीमा भोट हाल्न पाउने अधिकारलाई रोकेर गठबन्धनको नाममा उम्मेदवारी नै नदिएको उनले बताए । उनले चुनावी सभामा भने, ‘नेकपा एमालेको सरकार बन्नु बाहेकको विकल्प छैन ।’

बहुमत आउन सक्नेभन्दा कम क्षेत्रमा उम्मेदवार खडा गरेर बहुमत ल्याउने सबै पार्टीले अस्तित्व गुमाएको उनले बताए । ‘बहुमत ल्याउन नसक्ने गरि उम्मेदवारी दिने पार्टीले देशको भलो गर्न सक्दैन,’ पाैडेलले भने, ‘गठबन्धनका मान्छे पूर्व जानुपर्ने पश्चिम जान्छन् पश्चिम जाने पूर्व जान्छ्न्, यस्ताले देशलाई समृद्ध बनाउन सक्दैनन् ।’

---

गठबन्धनको अहिलेको योजना लुट्ने र खाने मात्र भएको भन्दै यस्तो प्रवृत्तिलाई निर्वाचनबाट बढार्नु पर्ने उनकाे भनाइ थियाे । विकास चाहने हो भने एमालेको सरकार बन्नुपर्ने भन्दै छोटै समयमा धेरै काम गरेपनि विकास एमालेको पालामा भएको उनले जानकारी दिए ।

वर्तमान सरकार विदेशीका लागि कम्फर्टेबल सरकार बनाउन लागिपरेको छ,' उनले भने, ‘अहिले हामीले विदेशीका लागि नभइ नेपालीका लागि सरकार निर्माण गर्नुपर्छ त्याे सरकार एमालेले मात्र बनाउने छ ।’ जनताको काम गर्न केपी ओली अझै पनि जनताको काममा रातदिन खटिरहेको पनि उनले बताए ।

यस्तै मकवानपुरकाे अर्काे औँद्योगिक क्षेत्र मयुरधाप औँद्योगिक क्षेत्रको सुरुवात भएपछि हेटौंडा उपमहानगरपालिका क्षेत्र र १४ नम्बर वडावासीले प्रत्यक्ष लाभ लिने उनले बताए ।