गण्डकी प्रदेश : यी हुन् गठबन्धनबाट मुख्यमन्त्रीका दाबेदार

पोखरा - निर्वाचन आयोगले समानुपातिक सांसदको सूची सार्वजनिक गर्दै छ । ६० सदस्यीय गण्डकी प्रदेश सभामा ३६ जना प्रत्यक्ष निर्वाचनबाट चुनिएर आइसकेका छन् । दलहरूले समानुपातिकको सूची पनि बुझाएका छन् । करि ६० सांसदको टुंगो लाग्ने अवस्थामा छ । अब निर्वाचित सांसदहरूको सपथ सबैभन्दा पहिलो कार्यसूची हुनेछ । प्रदेश प्रमुखले अधिवेशन आह्वान गरेपछि संसद बैठक सुरु हुन्छ । संसद बैठकको सुरुआतसँगै सरकार गठन प्रक्रिया चल्छ । 

गण्डकीमा सत्ता गठबन्धनको स्पष्ट बहुमत छ । केन्द्रीय राजनीति तलमाथि नभए कांग्रेस र माओवादीको गठजोडबाट यहाँ नयाँ सरकार गठन हुन्छ । तर, सरकारको नेतृत्व कसले गर्ने भन्ने चासो यतिबेला राजनीतिक बृत्तमा सुरु भएको छ । यसअघि कांग्रेसले नेतृत्व गरेका कारण आफुहरूले मुख्यमन्त्री पाउनुपर्ने दाबी माओवादीको छ भने कांग्रेसले प्राकृतिक न्यायको सिद्धान्त देखाउँदै ठूलो दलले सरकारको नेतृत्व पाउनुपर्ने तर्क गरेको छ । 

---

जे होस्, माओवादीबाट मुख्यमन्त्री बने हरिबहादुर चुमानको प्रवल सम्भावना छ । कांग्रेसमा भने प्रतिस्पर्धी बढी छन् । केन्द्रीय सदस्य सुरेन्द्रराज पाण्डे, कास्कीका विन्दुकुमार थापा, नवलपुरका सभापति महेन्द्रध्वज जिसी र पूराना नेता भोजराज अर्याल मुख्यमन्त्रीको रेसमा छन् । उनीहरू सबैजना केन्द्रीय नेतृत्वलाई खुशी पार्न तल्लीन छन् । पाण्डे र थापा संस्थापन समूहका हुन् भने जिसी र अर्याल संस्थापन इतरका नेता हुन् । 

निर्वाचित र समानुपातिकको सूची हेर्दा संस्थापन पक्षको झिनो बहुमत छ । तर,  पात्रका कारण सांसदहरू यताउति हुन सक्छन् । तथापि संसदीय दलको नेता चयनमा निर्वाचन नहुने सबै नेताहरूको दाबी छ । ‘सहमतिबाटै निकास निस्किन्छ । चुनाव गरेर दलको नेता चयन हुँदैन,’ पाण्डेले भने, ‘पहिला समानुपातिक सूची टुंगिएपछि दलको नेता चयनको प्रक्रिया थाल्छौं ।’ 

जिसी पनि सहमतिबाटै जाने बताउँछन् । ‘सहमति नै सबैभन्दा ठूलो निर्वाचन हो । प्रदेशलाई निकास दिन सक्ने र भिजन भएको मान्छे नै दलको नेता बन्ने हो,’ उनले भने, ‘मिलाएर अघि बढ्छौं । समझदारी बन्छ भन्ने लागेको छ ।’ 

माओवादी नेता चुमान भने माओवादीले मुख्यमन्त्री पाउँदा आफू नै सर्वसम्मत हुने बताउँछन् । उनी अघिल्लो कार्यकालमा पनि सर्वसम्मत दलको नेता भएका थिए ।

‘अनुभव र काम गरेको आधारमा म सर्वसम्मत दलको नेता चुनिन्छु,’ उनले भने, ‘मुख्यमन्त्री पनि यसपालि माओवादीले पाउँछ । केन्द्रीय नेताहरूले ढुक्क हुनुस् भन्नुभएको छ ।’ गण्डकीमा कांग्रेसले २७ सीट जितेको छ भने माओवादीले ८ तथा सत्ता गठबन्धनमै एकीकृत समाजवादीका १ सांसद हुने छन् । 

मनाङबाट निर्वाचित स्वतन्त्र सांसद दीपक मनाङे (राजीव गुरुङ) एकीकृत समाजवादी प्रवेश गरेका हुन् । २२ सीट रहेको एमाले र २ सीटको राप्रपा प्रतिपक्षमा रहने सम्भावना बढी छ । मुख्यमन्त्रीका दावेदारहरू निरन्तर काठमाडौं आउजाउ गरिरहेका छन् भने नेताहरू भेट्ने दौडधुप चलिरहेको छ ।