बागमती प्रदेश : शपथ ग्रहणको तयारी पूरा

मकवानपुर - बागमती प्रदेशसभामा नवनिर्वाचित प्रदेशसभा सदस्यहरूको शपथग्रहणको तयारी पूरा भएको छ । प्रदेश सभासचिवालयले भोलि १३ गते प्रदेश सभा सदस्यहरू मध्येका ज्येष्ठ सदस्य ७२ वर्षीय रामप्रसाद ढुङ्गानाको शपथग्रहण हुने र १४ गते अन्य सबै सदस्यहरूको शपथ ग्रहण कार्यक्रमबारे तयारी सकिएको प्रदेश सभा सचिवालयका सचिव कृष्णहरि खड्काले बताए ।

ढुंगानाले भोलि प्रदेश प्रमुखको कार्यालयमा प्रदेश प्रमुख यादवचन्द्र शर्माबाट शपथ लिनेछन् भने १४ गते ढुङ्गानाले अन्य १०९ सदस्यहरूलाई प्रदेश सभा सचिवालयमा शपथ गराउने छन् ।

---

गत ८ गते प्रदेश सभा सचिवालयमा बसेको सर्वदलीय बैठकले १३ र १४ गते शपथ ग्रहण गर्ने कार्यक्रमको लागि प्रदेश प्रमुख समक्ष प्रस्ताव गर्ने निर्णय गरेको थियो ।

प्रदेशसभा सचिवलायमा बसेको सर्वदलीय बैठकले पुस १७ गते बागमती प्रदेशको पहिलो बैठक बस्नको लागि समेत प्रदेश प्रमुख समक्ष प्रस्ताव गरिने निर्णय समेत गरेकाे थियो ।