संक्रमितलाई राख्‍न हेटौंडा अस्पतालमा २० एचडीयू बेड निर्माण

हेटौंडाः हेटौंडा अस्पतालले कोभिड–१९ संक्रमितको उपचार गर्न २० हाइ डिपेन्डेन्सी (एचडीयू) बेड तयार पारेको छ । शुक्रबारदेखि संचालनमा ल्याउने तयारी गरेको अस्पतालका कोभिड उपचार कक्षका चिकित्सक सागर काफ्लेले बताए । यसअघि हेटौंडा अस्पतालले १० एचडीयू बेडको संचालन गरेर कोभिड–१९ संक्रमितलाई उपचार दिन सुरु गरेको थियो । बिहीबार मकवानपुरको प्रमुख जिल्ला अधिकारी सहित स्वास्थ्यकर्मी, हेटौंडा उपमहानगरका प्रतिनिधि लगायतले कोभिड–१९ उपचार कक्षको निरीक्षण गरेका थिए । 

पाँच दिनमै २० एचडीयू बेडको संरचना तयार भएको प्रमुख जिल्ला अधिकारी भरतमणि पाण्डेले बताए । ‘अब गम्भीर संक्रमितको उपचार गर्न भरतपुर वा काठमाडौं जानु पर्दैन’ उनले भने । यस्तै १० बेडमा आइसीयू सेवा उपलब्ध हुनेछ । अस्पतालमा अहिले ६ वटा भेन्टिलेटर भए पनि ४ वटा प्रयोगमा आएका छन् । भेन्टिलेटर भने अहिलेसम्म संक्रमितलाई प्रयोग गर्न नपरेको कोभिड–१९ उपचारमा खटिएका चिकित्सक सागर काफ्ले बताए । अस्पतालमा हाल कुल १७ वटा आइसीयू बेड छन् । यसैगरी भेन्टिलेटरसहितको कोभिड आइसीयू छुट्टै संचालन गर्ने तयारी भएको उनले जानकारी दिए । अस्पतालको कोभिड–१९ उपचार कक्षमा अहिले ९ जना गम्भीर प्रकृतिका संक्रमितहरू उपचारत छन् । 
 

---