बागमती प्रदेश सभाको उपसभामुखमा अप्सरा चापागाईं निर्वाचित

मकवानपुर- बागमती प्रदेश सभाको उपसभामुखमा अप्सरा चापागाईं खत्री निर्वाचित भएकी छन् । सोमबार प्रदेश सभामा भएको उपसभामुखको निर्वाचनमा खत्री निर्वाचित भएकी हुन् ।

उनले नेकपा एमाले, नेकपा माओवादी केन्द्र, राप्रपा र हाम्रो नेपाली पार्टीका सांसदहरू समेतको गरी ६१ मत प्राप्त गरी विजयी भएकी हुन् । ११० सदस्यीय प्रदेश सभामा मतदानका क्रममा १०८ जना सांसद उपस्थित थिए । खत्रीको विपक्षमा ३९ सांसदले मतदान गरे भने ७ सांसद तटस्थ रहेका थिए ।

---

यसअघि भएको मतदानको विभाजनमा प्रदेशको उपसभामुख पदका उम्मेदवार नेपाल मजदुर किसान पार्टीकी गिता काफ्लेले जम्मा ३ मत प्राप्त गरिन् । उनको विपक्षमा ६१ सांसदले मतदान गरे भने र तटस्थमा ४४ सांसद रहेका थिए ।

एमालेकी चापागाईंलाई माओवादी सांसद कुमारी मोक्तान प्रस्तावक तथा आशा लामा समर्थक रहेका थिए । ललितपुरकी खत्री नेकपा एमालेबाट समानुपातिक निर्वाचन प्रणालीमार्फत प्रदेश सभामा निर्वाचित भएकी हुन् । 

उपसभामुखमा नेपाली कांग्रेसकी सोना परियार, नेपाल मजदुर किसान पार्टीकी रीता काफ्ले र एमालेकी अप्सरा चापागाईं खत्रीले उम्मेदवारी दर्ता गराएका थिए । उपसभामुख पदको निर्वाचनका लागि तीन जनाले उम्मेदवारी दर्ता गराएकोमा दुई जनाबीच मात्रै प्रतिस्पर्धा भएको थियो । नेपाली कांग्रेसबाट उम्मेदवार बनेकी सुना परियारको भने उपसभामुखमा निर्वाचन भएन ।

प्रदेश सभाको पहिलो बैठक बसेको १५ दिनभित्र प्रदेश सभाका सदस्यहरू आफूहरू मध्ये सभामुख र उपसभामुख चयन गर्नुपर्ने संवैधानिक व्यवस्था रहेको छ । प्रदेश सभाको पहिलो बैठक पुस १८ गते बसेको थियो । 

यसअघि पुस २९ गते प्रदेश सभामुखमा राप्रपाका भुवनकुमार पाठक निर्वाचित भएका छन् । सभामुख पाठकको अध्यक्षतामा बसेको प्रदेश सभाको चौथो बैठकले उपसभामुख चयन गरेको हो ।