हेटौंडाः बागमती प्रदेशमा आइसीयु र भेन्टिलेटरको संख्या थपिएका छन् । ६ दिनको अवधिमा प्रदेशमा ५ सय ३७ आइसीयु बेड र २ सय ३९ भेन्टिलेटर थिए । सोमबारसम्म बागमती प्रदेशमा ९५२ आइसीयु बेड, ३९९ भेन्टिलेटर र ७५२ हाइ डिपेन्डेन्सी (एचडीयु) बेड थपिएका छन् । 

यसअघि २१ बैशाखसम्म प्रदेशमा ४ सय १५ आइसीयु बेड र १६० भेन्टिलेटर उपलब्ध थिए । २२ बैशाखमा ३८ आइसीयु बेड र १२० भेन्टिलेटर थपिएसँगै प्रदेशमा ४५३ आइसीयु बेड र २८० भेन्टिलेटर भएका हुन् । २३ बैशाखमा १७७ आइसियू बेड थपिए भने २७ भेन्टिलेटर थपेर ६३० आइसीयु बेड र ३ सय ७ भेन्टिलेटको संख्या कायम गरिएको हो ।

---

सोमबार प्रदेशमा ३२२ आइसीयु र ९२ भेन्टिलेटर थप भएको प्रदेशको सामाजिक विकास मन्त्रालयका प्रवक्ता डा. पुरुषोत्तमराज सेढाईले बताए । उनले प्रदेशमा ४७ अस्पतालबाट कोभिडको सेवा दिइरहे पनि सबै अस्पतालमा आइसीयु र भेन्टिलेटर संख्या नबढेको जनाए । यसअघि प्रदेशमा एचडीयु बेडको संख्या खुलाइएको थिएन भने सोमबारबाट एचडीयु बेडको संख्या समेत खुलाइएको छ । अझै आइसीयु र भेन्टिलेटरेको संख्या बढ्ने उनले बताएका छन् । 

अहिले बागमती प्रदेशमा ५० हजार सक्रिय संक्रमित छन् । १ हजार ६१९ जनाको कोभिडका कारण मृत्यु भएको छ । ५६० जना आइसीयुमा, १ सय ९८ जना भेन्टिलेटर, ३ सय ८७ जना एचडीयु बेडमा र ३ हजार ३५१ जना संस्थागत आइसोलेसनमा उपचारत छन् । ४६ हजार ३ सय ८१ जना होम आइसोलेसनमा बसेका छन् ।