हेटौंडामा दोस्रो संस्करणको मेयर कप फुटबल प्रतियोगिता जेठ १५ बाट

मकवानपुर । दोस्रो संस्करणको मेयर कप फुटबल प्रतियोगिता जेठ १५ गते साेमबारदेखि सुरु हुने भएको छ । नगर खेलकुद विकास समितिको व्यवस्थापनमा हुने प्रतियोगिता हेटौंडा–५, पिप्लेस्थित पिप्ले–क्याम्पा रंगशालामा सञ्चालन हुने हेटौंडा उपमहानगरपालिका युवा तथा खेलकुद शाखाका प्रमुख बसन्तकुमार सिटौलाले बताए ।

प्रतियोगितामा सहभागी हुन हेटौंडाका उपमहानगरभित्रका सबै वडालाई पत्र पठाइसकेको सिटौलाले जानकारी दिए । प्रतियोगितामा सहभागीको लागि जेठ १३ गतेसम्म टिम दर्ता गर्न भनिएको छ । नकआउट चरणमा हुने प्रतियोगिताको फाइनल खेल जेठ २० गते हुनेछ ।

---

प्रतियोगिताको विजेताले नगद २ लाख रुपैयाँसहित शील्ड, मेडल र प्रमाणपत्र प्राप्त गर्नेछन् । उपविजेता टिमले १ लाख ५० रुपैयाँ प्राप्त गर्नेछन् । यस्तै, सेमिफाइनलमा प्रवेश गर्ने दुई टिमलाई ५०–५० हजार रुपैयाँ र विधागत उत्कृष्ट खेलाडीलाई ५–५ हजार रुपैयाँ प्रदान गरिने सिटौलाले जानकारी दिए ।