हेलम्बुले जलवायु विपद अध्ययन केन्द्र स्थापना गर्ने

काठमाडौँ -हेलम्बु गाउँपालिकाले जलवायु न्यायका लागि दातृ निकायसँग सहयोग माग्ने भएको छ । २०८०/८१ को नीति तथा कार्यक्रम सार्वजनिक गर्दै पालिकाले जलवायु न्यायका लागि विभिन्न निकायसँग सहयोग प्राप्तिको प्रक्रिया अघि बढाउने भएको हो । जलवायु परिवर्तनका कारण विपदहरू सामना गरिरहेको हेलम्बुले जलवायु परिवर्तन न्यूनीकरण गर्न विभिन्न नीति तथा कार्यक्रम अगाडि ल्याएको हेलम्बु गाउँपालिका अध्यक्ष निमा ग्याल्जेन शेर्पाले जानकारी दिए । 

हेलम्बुले जलवायु विपद अध्ययन केन्द्र स्थापनाका लागि प्रदेश सरकार र संघीय सरकारसँग सहयोग र सहकार्य गर्ने जनाएको छ । त्यस्तै जलवायु परिवर्तन न्यूनीकरणका लागि खोला खोल्सा र कुलेसाहरूलाई पुर्ववत रुपमा नै फर्काउन बजेट विनियोजन गर्ने उल्लेख गरेको छ । जलवायु परिवर्तन र विपद सम्बन्धी अध्ययनका लागि हेलम्बु गाउँपालिकाले भ्रेमाथाङसम्म हेलम्बु फ्लड ट्रेल निर्माण गर्ने जनाएको छ । 

---

त्यस्तै हेलम्बुले कक्षा छाड्ने विद्यार्थीको क्रम रोक्न विद्यार्थीको खातामा १ लाख कार्यक्रम अघि सारेको छ । त्यस्तै पालिकाका प्रत्येक दलित छात्रालाई १ लाख दिने घोषणा गरेको छ । पालिकाभित्रका खेलाडीहरूलाई प्रोत्साहनका लागि औषधि उपचार खर्च पालिकाले व्यहोर्ने भएको छ । पालिकाले पाँच लाखसम्मको औषधि खर्च व्यहोर्ने भएको अध्यक्ष शेर्पाले जानकारी दिए । त्यस्तै गाउँपालिकामा औद्योगिक ग्राम स्थापना गरिने भएको छ ।