बागमती प्रदेश सभाकाे बैठक बस्दै, बजेटमाथि छलफल हुने

मकवानपुर । बागमती प्रदेश सभाको बैठक आज बस्दैछ । गत असार १ गतेको प्रदेश सभा बैठकमा प्रदेशका आर्थिक मामिला तथा योजनामन्त्री बहादुरसिं लामाले आगामी आवको अनुमानित बजेट सार्वजनिक गरेका थिए ।

सोही दिन बसेकाे दोस्रो बैठकमा आर्थिक विधेयकसहित विभिन्न ६ वटा विधेयकहरु टेबुल गरिएलगतै सभामुख भुवन कुमार पाठकले अर्को बैठक असार १२ गते बस्ने गरी बैठक स्थगित गरेका थिए ।

---

आजकाे बैठक प्रदेश सभाकाे सभाहल हेटौंडामा अपराह्न १ बजे बस्ने भएको हो । आजकाे बैठकमा प्रदेश सरकारद्वारा प्रस्तुत गरिएको आगामी आव २०८०–०८१ को अनुमानित बजेटमाथि पूर्ण छलफल गर्ने कार्यसूची रहेको प्रदेश सभा सचिवालयले जनाएकाे छ ।

प्रमुख सचिव कृष्णहरि खड्काका अनुसार, प्रदेश सभा सचिवालयमा साेमबार बसेको कार्य व्यवस्था परामर्श समितिको बैठकले कार्यसूची तय गरेकाे हाे /