दुई ट्रक ठोक्किँदा आगलागी, दुई घाइते

मकवानपुर- मकवानपुरको मनहरी नयाँबस्तीमा भएको सवारी दुर्घटनामा आगलागी हुँदा २ जना घाइते भएका छ्न् ।

असार २३ गते राति १:४५ बजेको समयमा मनहरी ६ नयाँबस्ती डिपाट गाउँस्थित पूर्व पश्चिम सडक खण्डमा हेटौंडा तर्फबाट चितवनतर्फ जाँदै गरेको ना ६ ख ६६६७ नं.को ट्रक र विपरित दिशाबाट आउँदै गरेको ना ६ ख ६३१ नं.को ट्रक एक आपसमा ठक्कर खाई दुर्घटना हुँदा दुवै ट्रकमा आगलागी भएको थियो ।

---

दुर्घटनामा आगलागी हुँदा ना ६ ख ६६६७ नम्बरको ट्रकमा सवार चितवन राप्ती नगरपालिका-३ का ३५ वर्षीय विवेक तमाङ र ६३१ नम्बरको ट्रक चालक मनहरी-३ का ३२ वर्षीय अर्जुन कुमार प्रजा घाइते भएको मकवानपुर प्रहरीले जनाएको छ ।

घाइते दुवै जनाको अवस्था मध्यम रहेकोमा उपचारको लागि भतरपुर पठाइएको प्रहरीले जानकारी दिएको छ । हेटौंडा उपमहानगरपालिकाको २ वटा दमकलले आगो निभाउने कार्य गरिरहेको इलाका प्रहरी कार्यालय मनहरीका प्रहरी निरीक्षक कृष्ण राज ढकालले जानकारी दिए । 

दुर्घटना भएको दुवै ट्रक पूर्ण रुप जलेको बताइएको छ ।