मकवानपुर- मकवानपुरको मनहरी नयाँबस्तीमा भएको सवारी दुर्घटनामा आगलागी हुँदा तीन जनाको मृत्यु भएको छ भने २ जना घाइते भएका छ्न् । 

असार २३ गते राति १:४५ बजेको समयमा मनहरी ६ नयाँबस्ति डिपाट गाउँस्थित पूर्व पश्चिम सडक खण्डमा हेटौंडातर्फबाट चितवनतर्फ जाँदै गरेको ना ६ ख ६६६७ नं.को ट्रक र विपरीत दिशातर्फबाट आउँदै गरेको ना ६ ख ६३१ नं.को ट्रक एक आपसमा ठोक्किएर दुर्घटना हुँदा दुवै ट्रकमा आगलागी भएको थियो । 

---

आगलागीबाट दुवै ट्रक पूर्णरूपमा जलेको प्रहरीले जनाएको छ । ट्रक दुर्घटनामा ६६६७ नम्बर ट्रक चालक चितवन राप्ति नगरपालिका-८ का २८ वर्षीय रिहान रुम्बा तामाङ, ट्रकको सहचालक गोरखा गण्डकी गाउँपालिका गोर्दीटारका २१ वर्षीय को सुमन चेपाङ र ६३१ नम्बर ट्रक सहचालक मकवानपुर मनहरी ३ का २० वर्षीय अमृत प्रजाको मृत्यु भएको मकवानपुर प्रहरीले जनाएको छ । 

दुर्घटनामा ६६६७ नम्बरको ट्रकमा सवार चितवन राप्ती नगरपालिका-३ का ३५ वर्षीय विवेक तमाङ र ६३१ नम्बरको ट्रक चालक मनहरी ३ का ३२ वर्षीय अर्जुन कुमार प्रजा घाइते भएको मकवानपुर प्रहरीले जनाएको छ । 

तीन जना व्यक्तिहरू सवारी साधनमै च्यापिएको घाइतेहरूले जानकारी दिएका थिए । घाइते दुवै जनाको अवस्था मध्यम रहेकोमा उपचारको लागि भतरपुर पठाइएको प्रहरीले जानकारी दिएको छ । 

हेटौंडा उपमहानगरपालिकाको २ वटा दमकलबाट आगो निभाइएको इलाका प्रहरी कार्यालय मनहरीका प्रहरी निरीक्षक कृष्ण राज ढकालले जानकारी दिए ।