काठमाडौँ उपत्यकालाई व्यवस्थित बनाउन सरकारले उपत्यका गुरु योजना बनाउँदै

काठमाडौँँ- शहरी विकासमन्त्री सीता गुरुङले काठमाडौँँ उपत्यकालाई व्यवस्थित बनाउन सरकारले काठमाडौँँ उपत्यका गुरु योजना बनाइरहेको बताएकी छिन् । सोमबार जिल्ला समन्वय समिति ललितपुरको सातौं जिल्ला सभामा बोल्दै मन्त्री गुरुङले यस्तो बताएकी हुन् ।

उनले काठमाडौँँ उपत्यका घरै–घरको मात्रै शहर भएको जिकिर गरे । उनले राज्यको स्पष्ट शहरको स्वरूप बनाउने नीति बनाएर कार्यान्वयन हुन नसक्दा काठमाडौँ उपत्यकामा घरै मात्रै भएको बताए ।

---

मन्त्री गुरुङले काठमाडौँँ उपत्यकामा ठूलो शहर नभएको, गाडी पार्किङ गर्ने ठाउँ अभाव, खानेपानी, साना–साना पार्क र फुटपाथ केही पनि नभएर धेरै घरहरू भएको शहरका रूपमा स्थापित भएको बताए । उनले यसरी बनेका घरहरू राज्यले शहर व्यवस्थित बनाउने भनेर मात्रै पनि भत्काउन सक्ने अवस्था नभएको बताए ।

सरकारले बनाएको गुरु योजनाले शहरलाई थप व्यवस्थित र भएका बेथिति हटाउन सकिने उनकाे भनाइ छ । उनले काठमाडौँँ उपत्यकाबाट बग्ने वागमती नदी र त्यसका सहायक नदीहरूको सरसफाइ र त्योसँग जोडिएका मठ मन्दिर पुरातात्विक सांस्कृतिक वस्तुहरूलाई संरक्षण गरी पर्यटन विकास गर्ने गरी सरकार लागि रहेको बताए ।

गुरुङ​ले काठमाडौँँ उपत्यकालाई स्वच्छ र सफा शहर बनाउने कार्यको थालनी पनि गरेको उल्लेख गरे । उनले शहर व्यवस्थित बनाउनका निम्ति मुख्य गरी अव्यवस्थित र सुकुम्वासी बस्ती हटाउनुपर्ने बताए । उनले सरकारलाई अव्यवस्थित र सुकुम्वासी बस्ती हटाउन धेरै गाह्रो भएको बताए । 

मन्त्री गुरुङले खोला किनारका अव्यवस्थित र सुकुम्वासी स्थानीय सरकार,जिल्ला समन्वय र सांसदहरूको सहयोग आवश्यक पर्ने जिकिर गरे । उनले शहरको फोहोरमैला व्यवस्थापन स्थानीय सरकारको मातहत रहेको भन्दै शहरहरूमा अहिले जटिल समस्या भनेको फोहोरमैला व्यवस्थापन भएको पनि बताए । काठमाडौँँ महानगर र शहरी विकास मन्त्रालयले फोहोर उठाएन भनेर दीर्घकालीन समाधान दिन नसकिने भन्दै स्थानीय सरकार नै फोहोर व्यवस्थापनमा लाग्नुपर्ने र ललितपुर जिल्ला भित्रका स्थानीय तहहरूले छुट्टै आफ्नै फोहोर व्यवस्थापन गर्न सक्नुपर्ने उनकाे भनाइ छ ।