सामान्य विवादमा कुटपिट हुँदा मृत्यु

मकवानपुर- मकवानपुरको बकैया गाउँपालिकामा कुटपिटको कारण एक जनाको मृत्यु भएको छ । बकैया ८ देउता खोलाको शिरमा कुटपिटबाट एक महिलाको मृत्यु भएको प्रहरीले जनाएको छ। 

स्थानीय पातली माया भोलनसँगको झगडाका क्रममा कुटपिट हुँदा जालीमाया घिसिङको मृत्यु भएको बागमती प्रदेश प्रहरी कार्यालय हेटौंडाले जनाएको छ।

---

प्रहरीका अनुसार ४८ वर्षीया भोलनको कुटाइबाट घिसिङको मृत्यु भएको हो । देउता खोलाको शिर बस्ने घिसिङ र  भोलनबीच सामान्य बादविवादमा झगडा हुँदा भोलनले कुट्दा घिसिङको टाउकोको भित्रि भागमा चोट लागेर घाइते भएकी थिइन ।

उनको स्थानीय मेडिकलमा उपचार पश्चात वडाको न्यायिक समितिबाट उपचार खर्च कुटपिट गर्ने ब्यक्ति पातली मायाले ब्यहोर्ने सहमति समेत भएको थियो ।

साउन ३१ गते राती अचानक जालिमाया बेहोस भई उपचारको लागि चुरेहिल अस्पताल ल्याइएको थियो । चुरेहिल अस्पतालबाट थप उपचारको लागि टिचिङ अस्पताल काठमाडौँ पठाएकोमा डाक्टरले उपचार हुन नसक्ने भनेपछि घर ल्याउने क्रममा शुक्रबार बाटोमै मृत्यु भएको प्रदेश प्रहरी कार्यालयले जनाएको छ । 

कुटपिट गर्ने पातली मायाको खोजीकार्य र अनुसन्धान  प्रहरीले गरिरहेको छ ।