हेटौंडा उपमहानगरले ३ वडाबाट नदीजन्य पदार्थ उत्खनन् गर्ने

हेटौंडा : हेटौंडा उपमहानगरले जेठ मसान्तसम्ममा नदीजन्य पदार्थ उत्खनन् गरेर बिक्री गर्ने भएको छ । हेटौंडा उपमहानगरको तीनवटा वडामा नदी उत्खनन् गरेर नदी जन्य पदार्थ ढुंगा, गिट्टी र बालुवा बिक्री गर्ने भएको हो । 

हेटौंडा–१६, १७ र १८ नम्बर वडाबाट ३४ हजार ९ सय घनमिटर नदी उत्खनन् गरिने भएको छ । तीन वडाका ६ स्थानबाट नदी उत्खनन् गर्न प्रारम्भिक वातवरणीय परिक्षण प्रतिवेदन (आइइइ) गत वर्ष स्वीकृत भइसकेको थियो । राष्ट्रपति चुरे तराई मधेश संरक्षण विकास समितिबाट ६ वटा स्थानमा उत्खनन् गर्न स्वीकृत प्राप्त भइसक्दा पनि कोभिडका कारण काम अघि बढेको थिएन । 

---

हेटौंडा उपमहानगरका राजश्व शाखाका प्रमुख रामकृष्ण थापाका अनुसार आठ वटा क्रसर तथा बालुवा उद्योगले ढुंगा, गिट्टी तथा बालुवा उत्खनन् गरेर लैजान प्रस्ताव गरेका छन् । दुई उद्योगको प्रक्रिया नपुगेकोले ६ उद्योगले मात्रै उत्खनन् गर्न पाउनेछ । तीन वडाबाट ढुंगा, गिट्टी तथा बालुवा बिक्रीबाट करिब ५ करोड राजश्व उठ्ने अनुमान गरिएको उनले बताए । यता चालू वर्षमा मकवानपुरका सबै स्थानीय तहको नदी उत्खनन् गर्न आइइइ स्वीकृत हुन सकेको छैन । यसले गर्दा हेटौंडा उपमहानगरसँगै अन्य गाउँपालिकाहरुको राजश्व समेत कम उठ्ने देखिएको छ ।

चालू वर्षमा नदी उत्खनन् गर्न आइइइ स्वीकृत नहुँदा राजश्वको आम्दानी खुम्चिएको उपमहागरका राजश्व प्रमुख रामकृष्ण थापाले बताए । स्थानीय तहको मुख्यम राजश्वको आम्दानी ढुंगा, गिट्टी तथा बालुवा भएको उनको भनाई छ । 

गत वर्षहरुमा हेटौंडा उपमहानगरले १५ करोडभन्दा माथि ढुंगा, गिट्टी बालुवा बिक्री गरेर राजश्व प्राप्त गर्दै आएको थियो । नदी उत्खनन गर्न नपाउँदा ३ करोड पनि उठ्न मुस्किल हुने उनले बताए । उनले जेठ मसान्तसम्म नदीजन्य पदार्थ उत्खन्न गरेर बिक्री गर्दा ५ करोडसम्म राजश्व उठ्ने अनुमान गरिएको बताए । यसअघि मकवानपुरमा विपद्को जोखिमको नाममा ७ स्थानीय तहले नदीजन्य पदार्थ उत्खनन् गरेर बिक्री गरेका थिए ।