सर्वोच्चको फैसलाविपरीत चौंरीदेउराली गाउँपालिकामा फागुन १ गते सार्वजनिक बिदा

​​काठमाडौँ- सर्वोच्च अदालतको फैसलाविपरीत काभ्रेपलाञ्चोकको चौंरीदेउराली गाउँपालिका​ले फागुन १ गते सार्वजनिक बिदा दिएको छ । गाउँपालिकाले एक सूचना जारी गर्दै ‘जनयुद्ध दिवस’ को अवसरमा फागुन १ गते मंगलबार सार्वजनिक बिदा दिएको जनाएको हो ।

जारी सूचना मा भनिएको छ, 'उक्त दिन यस गाउँपालिकाको कार्यालय, अन्तर्गतका सम्पूर्ण विद्यालयहरू, स्वास्थ्य संस्थाहरूलगायतका सरकारी, गैर सरकारी बैंक तथा वित्तीय संघ संस्थाहरूमा सार्वजनिक बिदा दिने निर्णय भएको बेहोरा सूचित गरिन्छ ।' 

---

यसअघि सर्वोच्च अदालतले ‘जनयुद्ध’ शब्दलाई संविधानले मान्यता दिएको वा पहिचान गरेको अवस्था नदेखिएको प्रस्ट पारेको थियो । जनयुद्ध दिवसका अवसरमा सरकारले सार्वजनिक बिदा दिने घोषणा गरेको विरुद्ध सर्वोच्च अदालतमा दायर भएको रिट निवेदनमाथिको फैसलाको पूर्णपाठमा फागुन १ गते सार्वजनिक जनयुद्ध शब्द प्रयोग गरी बिदा दिन नमिल्ने उल्लेख छ ।