पर्यटकहरूलाई आकर्षित गर्न सौरहामा छतिया स्ट्रिट निर्माण

काठमाडौँ- पर्यटक गन्तब्यको रुपमा रहेको चितवनको सौरहामा पर्यटकहरूलाई आकर्षित गर्न छतिया स्ट्रिट निर्माण गरिएको छ । थारु समुदायको मुख्य बसोबास रहेको सौरहामा थारु समुदायको मौलिकता झल्कने खालका छतिया राखेर करीब ४५ मिटर लामो छतिया स्ट्रिट निर्माण गरेको हो ।

सौरहा थारु समुदायको बाहुल्य रहेको बस्ती हो । अहिले सो क्षेत्रमा बिभिन्न समुदायका व्यक्तिहरूले होटलहरू खोल्दै गएपछि सौरहाका थारु समुदायको अस्तित्व नै हराउँदै गएको छ । सौरहामा थारु समुदायको मात्र १ सय २ घर रहेका छन् ।

---

सौरहामा अहिले ४५ मिटर लामो बागमती प्रदेश सरकारको सहयोगमा छतिया स्ट्रिट निर्माण गरीएको रत्ननगर नगरपालिका-६ का वडा सदस्य वीरेन्द्र महतोले बताए । उक्त स्ट्रिट बागमती प्रदेश सरकारको ३० लाख र वडा कार्यलयबाट ३ लाखको लागतमा छतिया स्ट्रिट निर्माण गरिएको उनले जानकारी दिए ।

छतिया थारु समुदायले खेतमा काम गर्दा घाम पानीबाट बच्न ओढ्ने बास र भोर्लाको पातबाट बनेको ठूलो टोपी हो । उक्त स्ट्रिटमा पर्यटकलाई आकर्षित गर्न साझ पख थारु समुदायको खानाका परिकारहरू थारु समुदायले बनाएका ह्याण्डी क्राफ्टहरू बिक्री बितरणको लागि राखिने महतोले बताए । स्ट्रिटमा हप्ता २ दिन थारु समुदायको मौलिक सांस्कृतिक नाच झाम्टा र लाठी नाच प्रस्तुत गर्ने योजना रहेको बताइएको छ ।