म्याद सकिन लागेपछि धमाधम कोभिशिल्ड खोप लगाइँदै

हेटौंडा : प्रदेश स्वास्थ्य आपूर्ति व्यवस्थापन केन्द्र बागमती प्रदेशमा स्टोर गरेर राखिएको कोभिड–१९ विरुद्धको भारतीय खोप (कोभिशिल्ड) को म्याद असार मसान्तमा सकिदै छ । आउँदो जुलाई १५ सम्म खोपको म्याद भएको प्रदेश स्वास्थ्य आपूर्ति व्यवस्थापन केन्द्रका प्रमुख बसन्त अधिकारीले जानकारी दिए । म्याद सक्नुअघि नै गत माघ महिनादेखि पहिलो डोज खोप लगाइसकेकाहरुलाई दोस्रो डोजको खोप लगाउने उनले बताए । 

स्वास्थ्य आपूर्ति केन्द्रबाट बागमती प्रदेशको चितवन, मकवानपुर र सिन्धुलीमा खोप जाने गरेको छ । यसअघि कोभिशिल्ड भने प्रदेश २ को ८ जिल्लामा समेत केन्द्रबाट पठाइएको थियो । यही असार ३१ सम्म म्याद भएको कोभिशिल्ड अझै ३० भाइल बाँकी भएको अधिकारीले बताए । 

---

सो खोप जिल्ला स्वास्थ्य कार्यालय या कुनै पनि स्थानीय तहले आवश्यकता अनुसार माग गर्न सक्नेछन् । यता प्रदेश आपूर्ति स्वास्थ्य व्यवस्थापन केन्द्रमा भने कोभिड–१९ विरुद्धको चाइनिज खोप भेरोसेल पर्याप्त मात्रामा रहेको छ । २२ हजार ५ सय ६४ भाइल भेरोसेल स्टोर गरेर राखिएको छ । भेरोसेल खोपको म्याद भने २०२३ सम्म छ । भेरोसेलको पहिलो डोज खोप लगाएकाले दोस्रो डोज समयमै पाउने  भएका छन् । 

कोभिशिल्ड भने देशमै स्टक नभएको हुँदा केहीलाई मात्र लगाउन पुग्ने अधिकारीले बताए । मकवानपुरमा कोभिशिल्डको पहिलो डोज लगाएका २१ हजार ४ सय ३ जना छन् तर उनीहरु सबैले दोस्रो डोज खोप भने लगाउन नपाउने भएका छन् ।

मकवानपुरमा कोभिशिल्ड खोपको म्याद सकिन लागेसँगै खोप लगाउन तिव्र पारिएको छ । जुन १५ अन्तिम म्याद सकिनै लाग्न कोभिशिल्ड खोप फ्रन्टलाइनमा खटिने कर्मचारी, पत्रकार, स्वास्थ्यकर्मी लगायत अन्यलाई दास्रो डोज लगाइएको थियो ।

यसैगरी आउँदो जुलाई १५ मा खोपको म्याद सकिन लाग्दै गर्दा लगाउन छुटेका फ्रन्टलाइन रहने व्यक्ति र नेताहरुले मात्र खोपको दोस्रो डोज लगाउन पाउने भएका छन् । स्वास्थ्य कार्यालय मकवानपुरलाई प्राप्त कोभिशिल्ड खोप गत माघ १४ गते लगाउन रुची नदेखाएकाहरुले पनि अहिले लगाएको स्वास्थ्य कार्यालय मकवानपुरका प्रमुख प्रणय उपाध्यायले बताए ।
 
मकवानपुरमा स्थानीय तहलाई लगाउन पठाइएको चाइनिज खोप फिर्ता भएको  छ । जिल्लाको दुर्गम तथा विकट क्षेत्रका ६२ देखि ६४ वर्षका केही नागरिकहरुले खोप लगाउन नमानेपछि खोप फिर्ता भएको हो । ६२ देखि ६४ वर्षसम्म नागकिरलाई खोप लगाउन मकवानपुरका दश स्थानीय तहमा ६५ सय खोप पठाइएको थियो ।

यसमध्ये ४ हजार ४४७ जनाले खोप लगाए भने १८ सय ९४ फिर्ता भएको स्वास्थ्य कार्यालय मकवानपुरका प्रमुख प्रणय उपाध्यायले जानकारी दिए । मकवानपुरको हेटौंडा उपमहागरले ४७०, थाहा नगरले २७७, इन्द्रसरोबरले १ सय २६, कैलाशले १८९, बकैयाँले १९४, बागमतीले ४३, मनहरीले २८४, भीमफेदीले २०९, राक्सिराङ ३९ र मकवानपुरगढीले ६० जनालाई लगाउन पुग्ने खोप फिर्ता गरेका हुन् ।  

फिर्ता भएको खोप प्रमुख जिल्ला अधिकारीको संयोजकत्वमा हुने जिल्ला खोप समन्वय समितिमार्फत फ्रन्टलाइनमा खटिने कर्मचारी, पत्रकार, स्वास्थ्यकर्मीलाई लगाएको छ । उनीहरुलाई खोप लगाएसँगै जिल्लामा ६ हजार ४ सय ४८ जनाले भेरोसेलको पहिलो डोज लिएका छन् ।