ललितपुर महानगरले दियो दक्षिणकालीलाई १ करोड, अन्य पाँच  पालिकालाई ५० लाख

ललितपुर - ललितपुर महानगरले  बाढी प्रभावित ६ वटा पालिकालाई साँढे तीन करोड राहत सहायता रकम दिने भएको छ । 

ललितपुर महानगरको बुधबार बसेको कार्यपालिका बैठकले ललितपुर जिल्लाका गोदावरी नगरपालिका, महालक्ष्मी नगरपालिका, बागमती गाउँपालिका , महाकांल गाउँपालिका, कोन्ज्योसोम गाउँपालिकालाई ५०/५० लाख दिने निर्णय गरेको हो ।

---

त्यसैगरी बैठकले दक्षिणकाली नगरपालिकालाई एक करोड दिने निर्णय गरेको छ । असोजको दोस्रो साता गएको बाढी पहिरोबाट यी पालिकामा धेरै जनधनको क्षति भएको । भौतिक पूर्वाधार भत्किएका छन् । पानीको मुहानमा अवरोध पुगेको छ । पानीको पाइप भाँचिएका, परिएका र थिचिएका छन् । 

ललितपुर महानगरद्धारा जारी विज्ञप्तिमा भनिएको छ , ‘विपद व्यवस्थापनमा सहयोग पुगोस् भनेर सहयोग गरेका हौं ।’ ललितपुरको दक्षिण भेगमा अवस्थित गोदावरी नगरपालिका, महांकाल गाउँपालिका, कोन्ज्योसोम गाउँपालिकालाई संघीय सरकारले विपद् संकटग्रस्त पालिका घोषणा गरेको छ ।

महानगरका प्रमुख चिरीबाबु महर्जनले  अभिभावकत्व ग्रहण गर्दै अप्ठ्यरो परेको बेलामा सहयोग गरेको बताए । उनले भने, ‘यो सहयोगले बिग्रिएका,भत्किएका संरचना पुनर्निर्माण गर्न र जनजीवन सहज बनाउन सहयोग पुग्ने विश्वास लिएका छौँ । ’