बागमती प्रदेश सभामा बजेटबारे छलफल सुरु

हेटौंडा : बागमती प्रदेश सभामा आगामी आर्थिक वर्ष ०७८/०७९ को वार्षिक बजेटमाथि छलफल सुरु भएको छ । प्रदेश सरकारले आगामी वर्षको लागि असार १ गते ५७ अर्बको बजेट प्रस्तुत गरेको थियो । बजेट प्रस्तुत भएको १७ दिनपछि आय र व्ययमाथि आज सामान्य छलफल भएको हो । 

छलफलमा भाग लिँदै सांसद विराजभक्त श्रेष्ठले यो वर्षमा सवारी साधन कर पूर्ण छुट दिन सरकारलाई आग्रह गरेका छन् । सवारी साधन राम्रोसँग चल्न नपाएका कारण सरकारले कर छुट गनुपर्ने उनले बताए । उनले बजेट ल्याउँदा ४ वर्षको बजेटको समीक्षा गनुपर्ने भन्दै कर्मकाण्डीको लागि औपचारिक छलफल गर्न नहुने बताए ।
 
सांसद लेखनाथ दाहालले पनि औपचारिकताको लागि छलफल गर्ने र पारित गर्न गणितीय माध्यम हुने भन्दै यस्तो परम्परा सच्चाउनुपर्ने बताए । सरकारले विपद् व्यवस्थापनमा पर्याप्त बजेट छुट्टाउन उनले माग गरे । सांसद प्रभात तामाङले आय र व्यय दुवैको अनुमान प्रदेस सरकारको काल्पनिक भएको बताए  । 

---

चालू वर्षको चैत्र सम्म ३२ प्रतिशत बजेट खर्च भएको भन्दै सरकारसँग बजेट खर्च गर्ने सक्न क्षमता नभएको उनले बताए । राजश्व आम्दानी गर्न र खर्च गर्न दुवैमा सरकार फेल भएको उनले  आरोप लगाए । गित गाउनलाई र चुनावी बजेट मात्र बाँडफाँड गरेको भन्दै आगामी बजेट कार्यान्वयन नै नहुने उनले ठोकुवा गरे । 

सिन्धुपाल्चोकबाट प्रतिनिधित्व गर्ने सांसद इन्द्रमाया गुरुङले भने बाढीपहिरोमा परेर बेपत्त भएकाहरुकाले खोज गर्न सरकारसँग आग्रह गरिन् । यस्तै मेलम्ची, हेलम्बुमा बेलिब्रिज संचालनमा तत्परता देखानउ आवश्यक भएको गुरुङले बताइन् ।