बागमती प्रदेश : कहाँ-कहाँ संचालन हुँदैछ विद्युतीय बस ?

हेटौंडा : २०८५ सम्म पेट्रोलमा निर्भर यातायातलाई क्रमश विस्थापन गर्दै जाने नीति अनुसार बागमती प्रदेशसले पहिलो चरणमा ३० वटा विद्युतीय बस खरिद गर्दैछ । आगामी साउन महिनामा प्रदेश सरकारले बस खरिदको लागि टेन्डर आह्वान गर्ने तयारी गरेको हो ।  

विद्युतीय बस खरिद गर्न प्रदेश सरकारले २ वर्षदेखि बजेट विनियोजन गर्दै आएको छ । प्रदेश सरकारले पहिलो चरणमा १० मिटरदेखि १०.५ मिटरसम्मको सिटी बस र ८.५ देखि ९ मिटरसम्मको सिटी बस खरिद गर्ने भएको हो । २० वटा सिटी बस र १० वटा कोच बस खरिदको टेन्डर गर्ने तयारी अन्तिम चरणमो भौतिक पूर्वाधार विकास मन्त्रालयका सचिव संजीव बरालले जानकारी बताए ।  

---

बागमती प्रदेशको मुख्य शहरहरुमा विद्युतीय बसहरू संचालन हुनेछ । पहिलो चरणमा खरिद गर्ने ३० वटा विद्युतीय बसहरू आगामी ०७९ सालको जेष्ठ महिनासम्म आइपुग्नेछ । २० वटा सिटी बसमध्ये चितवनको भरतपुर–मनहरी–हेटौंडासम्मको रुटमा ८ वटा बस चल्नेछ । 

त्यस्तै काठमाडौँ चक्रपथमा १२ वटा सिटी बस चल्नेछ । यता कोच बस भने काभ्रेको धुलिखेल–काठमाडौँ–भरतपुर हुँदै हेटौंडासम्मको रुटमा दुई वटा मात्र चल्नेछ । धुलिखेल–काठमाडौं–भरतपुरसम्मको रुटमा ४ वटा कोच बस, काठमाडौ–गल्छी–बिदुर बसपार्कसम्मको रुटमा ४ वटा कोच बस संचालन गर्ने तयारी प्रदेश सरकारको छ ।

प्रदेश सरकारले विद्युतीय बसलाई चार्जिङ गर्न १५ वटा चार्जिङ स्टेशन स्थापना गर्ने भएको छ । साउनमा टेन्डर भएसँगै १५ वटा विद्युतीय सवारी चार्जिङ मेशिन यही वर्षको फागुनसम्म आइपुग्ने सचिव संजीव बरालले बताए । हालसम्म चार्जिङ स्टेशन राख्न १२ स्थानमा सहमति भएको छ । 

प्रदेश सरकारले उपत्यकाको गोंगबु नयाँ बसपार्कमा २ वटा, चक्रपथमा ३ वटा, धुलिखेल बसपार्कमा १, गजुरीमा १, विदुर बट्टाइ बसपार्कमा १, भरतपुर बसपार्कमा १ र हेटौंडाको २ स्थानमा चार्जिङ स्टेशन राख्न सहमति प्राप्त भएको जनाइएको छ । यस्तै नेपाल विद्युत प्राधिकरणले बागमती प्रदेशलाई १० वटा भेइकल चार्जर दिने भएको छ ।  

आगामी आर्थिक वर्षमा दोस्रो चरण अन्तर्गत प्रदेश सरकारले थप ५० वटा विद्युतीय बस खरिद गर्ने योजना बनाएको छ । आगामी वर्षमा सरकारले ५० करोड बजेट विद्युतीय सवारी खरिद गर्न विनियोजन गरेको छ । 

दोस्रो चरणमा प्रदेश सरकारले काठमाडौँको चक्रपथमा १४ वटा सिटी बस, धुलिखेल–कोटेश्वर–जमल–महाराजगंज–चाहबिल–धुलेखल दुईतर्फी २० वटा थप सिटी बस संचालन गर्नेछ । धुलिखेल– धादिङ बेशिमा २ वटा, धुलिखेल–काठमाडौँ–भण्डारा रुटमा २ वटा, हेटौंडा–गल्छी–विदुरसम्मको रुटमा २ वटा, धादिङबेसीदेखि भरतपुरसम्म २ वटा, गोंगबु बसपार्क देखि बाह्बिसेसम्म २ वटा थप कोच बस संचालन गर्ने योजना रहेको छ । 

आर्थिक वर्ष ०८०/८१ भित्रै बागमती प्रदेश सरकारले तेस्रो चरणमा काठमाडौँको चक्रपथमा ४ वटा सिटी बस, धुलिखेल–कोटेश्वर–जमल–महाराजगंज–चाहबिल–धुलिखेल दुईतर्फी १० वटा, गोदावरी–बल्खु–जमल दुई तर्फी १६ वटा, दक्षिणकाली–बल्खु–जमल दुईतर्फी १६ वटा र पर्यटकीय सेवाको लागि भक्तपुर–मध्यपुर–पशुपति–स्वयम्भू–पाटनमा ८ वटा सिटी बस थप्ने योजना बनाएको छ ।

यसैगरी गोंगबु बसपार्कदेखि बास्रबिसेसम्म थप ४ वटा कोच बस थपिनेछ । गोंगबु बसपार्कदेखि चौतारासम्म ४ वटा, सिन्धुली–हेटौंडा–भरतपुरसम्म २ वटा र काठमाडौँ–चरिकोट–मन्थली–खुर्कोटसम्म ४ वटा विद्युतीय कोच बस थप गर्ने रणनीकि योजना प्रदेश सरकारले लिएको छ । 

प्रदेश यातायात संचालन तथा व्यवस्थापन बोर्ड मार्फत सरकारले विद्युतीय बसलाई नियमन गर्ने भएको हो । बोर्डको ऐन भने बन्न बाँकी रहेको छ । बोर्डको ऐनको मस्यौदा चालू असार मसान्तसम्म निर्माण हुने सचिव बरालले जानकारी दिए । बस संचालन तथा कार्यविधि, मानव संसधान व्यवस्थापन नियमावली (डाइभर तथा साहायक भर्ना कार्यविधि), मर्मत सम्भार कार्यविधि र वित्तिय साझेदारी कार्यविधि भने निर्माण हुन बाँकी छ ।