महर्जन सर्वोत्कृष्ट वडाध्यक्ष घोषित, ‘स्थानीय सेवा गौरव पुरस्कार-२०८१’बाट सम्मानित

काठमाडौँ- काठमाडौँ महानगरपालिका वडा नम्बर ४ का वडाअध्यक्ष दिनेश महर्जनलाई 'स्थानीय सेवा गौरव पुरस्कार- २०८१' प्रदान गरिएको छ । काठमाडौँ महानगरपालिकाको ३०औं महानगर दिवस र महानगर सभाको १६औं अधिवेशनको अवसरमा सर्वोत्कृष्ट वडाअध्यक्ष घोषित भएका हुन् ।

उत्कृष्ट कार्य सम्पादन, विकास निर्माण र वडाको समग्र प्रगतिमा उनले पुर्‍याएको योगदानलाई कदर गर्दै काठमाडौँ  महानगरपालिकाले स्थानीय सेवा गौरव पुरस्कार-२०८१ पदकसहित  नगद  १ लाख रुपैयाँले सम्मान गरिएको हो ।

---

पुरस्कार ग्रहण गरेपछि महर्जनले  खुशी व्यक्त गर्दै भनेका छन्, “यो सम्मान वडा नं ४ का स्थानीयवासीको सहयोगको परिणाम हो । सम्पूर्ण वडावासी, जनप्रतिनिधि, यस वडामा काम गर्ने कर्मचारीलाई हार्दिक नमन छ । यो सम्मानले कामप्रति थप ऊर्जा थपेको महसुस गरेको छु ।”

महर्जनको नेतृत्वमा वडा नं ४ मा विकास निर्माणका महत्वपूर्ण परियोजनाहरू सम्पन्न भएका छन् । उनको नेतृत्वमा पूर्वाधार सुधार, सामाजिक सेवामा पहुँच वृद्धि, र समग्र वडावासीको जीवनस्तर उकास्नका लागि विविध कार्यक्रमहरू सञ्चालन गरिएका छन् ।