फेरि पहिरो गएपछि नवलपुर-चौतारा सडक बन्द

सिन्धुपाल्चोक - साउन २९ गते रातिको अविरल वर्षाका कारण पहिरो गई नवलपुर–चौतारा सडक बन्द भएको छ । इन्द्रावती गाउँपालिका वडा नं २ को बेंशीमाथिको पहरो भएको ठाउँमा पहिरो गई सडक बन्द हुन पुगेको स्थानीयवासी विष्णु भारतीले जानकारी दिएका छन् । सडकमा खसेको लेदो सोहोर्ने काम भए पनि सडकको डिल नै भत्केकाले चारपांग्रे सवारी छिर्न सक्ने अवस्था नरहेको पनि उनले बताए । 

सडक कुना भागबाट फराकिलो बनाउन पनि पहरो भएकाले तत्काल कटान गर्न नसकिने इन्द्रावती–२ का वडाध्यक्ष वीरबहादुर तामाङले बताए । आइतबार प्राविधिक आएर हेरेपछि तत्काल बाटो खुलाउन लागिपर्ने वडाध्यक्ष तामाङले जानकारी दिएका छन् । 

---

ज्यामिरे, शिखरपुर, नवलपुर, बाँडेगाउँ तथा कुन्चोकवासीलाई सदरमुकाम चौतारा तथा राजधानी काठमाडौं जाने सडक बन्द हुँदा सेवाग्राही मर्कामा परेका छन् । 

हाल दुई वटा यात्रुवाहक गाडीका साथै मालवाहक ढुवानीका साधन चलिरहेको सडक अवरुद्ध हुँदा खाद्य सामग्री ढुवानीमा पनि समस्या हुने देखिएकाले तत्काल बाटो खुलाउनुपर्नेमा स्थानीयवासीले जोड दिएका छन् । रासस