तोकिएको समयमै मापदण्ड अनुसार सडक निर्माण सक्न आयोग सदस्य फुयाँलको निर्देशन

सिन्धुपाल्चोक- राष्ट्रिय योजना आयोगका सदस्य डा. रामकुमार फुयाँलले तोकिएको समयसिमाभित्रै मापदण्ड अनुसार सडक निर्माण सम्पन्‍न गर्न सम्बन्धित पक्षलाई निर्देशन दिएका छन् । बलेफी तेम्बाथान सडकखण्डको सोमबार स्थलगत निरिक्षणपछि फुयाँलले सडक निर्माण पक्षलाई निर्देशन दिएका हुन् । 

---

आयोगका सदस्य फुयाँल, सभामुख अग्निप्रसाद सापकोटाका स्वकीय सचिव गोविन्द पाठक, प्रेस विज्ञ श्रीधर न्यौपाने, संघीय सडक डिभिजन कार्यालय दोलखा र प्रादेसिक सडक डिभिजन कार्यालय खुर्कोटबाट खटिएका ईन्जिनियर एवं प्राविधिकसहितको टोलीले निर्माणाधिन सडकको विस्तृत निरिक्षण गरेको हो । 

अरनिको राजमार्ग अन्तरगतको बलेफी बजारदेखि नौबिसे सडकखण्ड र जलबिरेदेखि कात्तिके सडक खण्डको जुगल गाउँपालिका अन्तरगतको ढाँडे हुँदै गणेश खोलासम्मको स्थलगत निरिक्षणका क्रममा निर्माण कार्यमा थुप्रै सुधारको आवश्यकता औंल्याइएको छ । निरिक्षणका क्रममा सदस्य फुयाँलले जलबिरे कात्तिके सडकखण्डका लागि ठेक्का पाएको निर्माण पक्षलाई डिपिआर, ड्रोइङ र डिजाइन अनुसार निर्माण कार्य सम्पन्‍न गर्न निर्देशन दिए । 

उनले ढाँडे-कात्तिके सडक खण्डको कुम्भेश्वर वारीपट्टिको खण्ड देखि गणेश खोलासम्मको भाग निकै जोखिपूर्ण देखिएको बताउँदै सो क्षेत्रमा बलियो निर्माणका लागि थप उपायहरू अवलम्बन गर्न निर्माण पक्ष र प्राविधिक सहयोग गर्न सरकारी प्राविधिकहरूलाई निर्देशन दिए ।

सडक डिभिजन कार्यालयकी ईन्जिनियर मैना राइले सो क्षेत्रमा लगातार सडक भासिने, पहिरो खस्ने र लगाइएको तार जाली पल्टिने घटना दोहोरिएको बताउँदै माथिल्लो भाग देखि नै ठूलो क्षेत्र भासिएकोले बेलैमा सतर्क हुनु पर्ने अबस्था आएको जानकारी दिए ।

बलेफी नौबिसे सडक खण्डको निर्माणको ठेक्का पाएको निर्माण पक्षसँग जँगारे क्षेत्रमा भएको छलफलमा पनि सदस्य फुयाँलले डिपिआर, ड्रोइङ र डिजाइन अनुसार काम गर्न निर्देशन दिए । उनले केही समयपछि प्राविधिक टोलीसहित फेरि विस्तृत निरिक्षण गरिने जानकारी दिँदै तोकिएको मापदण्ड पुरा गरेको नपाइए संलग्न सबै पक्ष कारबाहीको भागिदार हुनेतर्फ सचेत गराए ।