मुख्यमन्‍त्री डोरमणि पौडेलविरुद्ध अविश्‍वासको प्रस्ताव पेश

काठमाडौं : बागमती प्रदेशका मुख्यमन्त्री डोरमणि पौडेलविरुद्ध प्रदेश सभामा अविश्‍वासको प्रस्ताव पेश भएको छ ।  अविश्‍वास प्रस्तावका हस्ताक्षरकर्ता अरुण नेपालले आजको प्रदेश सभा बैठकमा अविश्‍वासको प्रस्ताव पेश गरेका हुन् ।  ‘आजको प्रदेश सभामा अविश्‍वासको प्रस्तावमात्रै पेश भयो,’ बागमती प्रदेश सभाका सचिव कृष्णहरि खड्काले भने, ‘अविश्‍वासका प्रस्तावका एक नम्बर हस्ताक्षरकर्ता अरुण नेपालले प्रस्ताव पेश गर्नु भयो । प्रदेश सभाको अबको बैठक १९ गते बस्छ ।’ 

सत्तारुढ नेकपा केन्द्रमा विभाजित भएपछि प्रदेशमा पनि त्यसको असर देखिएको हो । नेकपाको दाहाल-नेपाल समूहले बागमती प्रदेशका मुख्यमन्त्री पौडेल र प्रदेश १ का मुख्यमन्त्री शेरधन राईविरुद्ध अविश्वासको प्रस्ताव दर्ता गरेको थियो । ११० जना सदस्य रहेको बागमती प्रदेशस सभामा अविश्वासको प्रस्ताव पारित हुन ५६ जना सदस्यले पक्षमा मतदान गर्नुपर्नेछ ।  

---

मुख्यमन्त्री पौडेल नेकपाका अध्यक्ष तथा प्रधानमन्त्री केपी ओली पक्षका नेता हुन् ।  अविश्वासको प्रस्ताव पारित गराउन वा मुख्यमन्त्रीले विश्‍वासको मत लिन प्रमुख विपक्षी कांग्रेसको भूमिका महत्‍वपूर्ण देखिएको छ । कांग्रेस सभापति शेरबहादुर देउवाले प्रदेश सभाको विषयमा पार्टी भित्र छलफल  सुरू गरेका छन् ।