प्रदेश राजधानीसँग सडक जोड्न ४ स्थानीय तहसँग सम्झौता

हेटौँडा : बागमती प्रदेशको राजधानी हेटौडासँग सडक सञ्जाल नजोडिएका ४ वटा जिल्लाका स्थानीय तहसँग आइतबार समझदारीपत्रमा हस्ताक्षर गरिएको छ । बागमती प्रदेशको भौतिक पुर्वाधार विकास मन्त्रालय र स्थानीय तहसँग सडक सञ्जाल जोड्ने समझदारी पत्रमा हस्ताक्षर भएको हो ।

बागमती प्रदेशको सिन्धुलीको पाटन गाउँपालिका, रामेछापको डोरम्बा गाउँपालिका, काभ्रेको खानीखोला गाउँपालिका र धादिङको धुनिबेशी नगरपालिकासँग समझदारी पत्रमा हस्ताक्षर गरिएको हो । 

---

भौतिक पुर्वाधार विकास मन्त्री रामेश्वर फुयालले सडक सञ्जालले नजोडिएका स्थानीय तहहरुको हालसम्म ६० वटा निवेदन परेको जानकारी गराए । मन्त्री फुँयालले प्रथमिकताका आधारमा सबै स्थानीय तहसँग प्रदेशको राजधानी जोडिने बताए । बजेट अभावका कारण सबै स्थानीय तहलाई समेट्न नसकेपनि यो वर्ष चारवटा स्थानीय तहलाई भने प्रदेशको राजधानी हेटौँडासंग जोड्नेगरी काम सुरु हुने जनाए । 

प्रदेशको भूमी ब्यवस्था कृषि तथा सहकारी मन्त्री दावा दोर्जे लामा, प्रदेश नीति तथा योजना आयोगका सदस्य श्याम बस्नेत, मन्त्रालयका सचिब तथा कर्मचारीहरुको उपस्थितिमा समझदारीपत्रमा हस्ताक्षर भएको थियो ।