अवैध कारोबारमा संलग्न भएको आरोपमा ७ जना प्रहरीको नियन्त्रणमा

मकवानपुर- जिल्ला प्रहरी कार्यालय मकवानपुरले अवैध कारोबारमा संलग्न रहेको आरोपमा ७ जनालाई नियन्त्रणमा लिएको छ । जिल्ला प्रहरी कार्यालय मकवानपुरका निमित्त प्रहरी प्रवक्ता एवम् प्रहरी निरीक्षक राजकुमार सापकोटाका अनुसार २  किलो २०० ग्राम  लागुऔषध गाँजा सहित २ जना नियन्त्रणमा लिएको छ।

मकवानपुरको भैसें प्रहरी चौकीबाट खटिएको प्रहरी टोलीले मकवानपुर जिल्ला भीमफेदी गाउँपालिका –२ मा सवारी जाँचको क्रममा लागुऔषध गाँजा सहित २ जनालाई नियन्त्रणमा लिएको हो । जिल्लाको कैलाश गाउँपालिका ४ बस्ने १९ वर्षीय अमृत मोक्तान र अर्का एक व्यक्तिले लुकाई ल्याएको लागु औषध गाँजा २ किलो २०० ग्राम सहित नियन्त्रणमा लिएको हो । यसबारे थप अनुसन्धान भईरहेको निमित्त प्रहरी प्रवक्ता सापकोटाले बताए ।

यसैगरी जिल्ला प्रहरी कार्यालय मकवानपुरबाट खटिएको प्रहरी टोलीले हेटौडा १० बसपार्कबाट चितवन जिल्ला राप्ती नगरपालिका ८ बस्ने २६ वर्षीय अमृत सुनार र चितवन जिल्ला खैरहनी नगरपालिका ७ बस्ने २७ वर्षीय किसन विश्वकर्मालाई लागु औषध सहित नियन्त्रणमा लिएको छ ।

उनीहरुको साथबाट डाइजेपाम १७ एम्पुल, फेनार्गन १९ एम्पुल र नुर्फिन १५ एम्पुल तथा लागुऔषध खैरो हिरोईन जस्तो देखिने पदार्थ २४० मिली ग्राम फेला पारेका छ ।

यसैगरी प्रहरीले १८० किलो लागुऔषध गाँजा सहित, पिकअप गाडी र  ३ जना व्यक्तिलाई नियन्त्रणमा लिएको छ । ईलाका प्रहरी कार्यालय मनहरी मकवानपुरबाट प्रहरी निरीक्षक प्रकाश थापाको कमाण्डमा खटिएको प्रहरी टोलीले मकवानपुर मनहरी गाउँपालिका ७ को सडकखण्ड चैनपुरबाट हेटौडा तर्फ आउदै गरेको बा ७ च १६०६ नम्बरको पिकअप गाडीलाई चेकजाँच गर्ने क्रममा गाँजा र व्यक्ति सहित नियन्त्रणमा लिएको हो ।

सवारी चालक मकवानपुर हेटौडा १६ का बस्ने २९ वर्षिय बुद्धीमान वाईबा, पिकअपमा रहेका सोही स्थानका २९ वर्षिय अर्जुन स्याङतान र ३० वर्षिय बिनोद पाख्रिनलाई प्रहरीले नियन्त्रणमा लिएको हो ।

उनीहरुको साथबाट लागुऔषध गाँजा १८० किलो फेला परेपछि अनुसन्धान भईरहेको प्रहरी कार्यालमा आज आयाेजित पत्रकार भेटमा सापकोटाले बताए ।

 

---