कांग्रेस सिन्धुपाल्चोकले गर्‍यो तीन नगरपालिकाको उम्मेदवारको सिफारिस

काठमाडौँ - नेपाली कांग्रेस सिन्धुपाल्चोकले स्थानीय तह निर्वाचनका लागि १२ स्थानीय तहमध्ये सिन्धुपाल्चोकका तीन वटा नगरपालिकाको उम्मेदवारको सिफारिस प्रदेशमा गरेको छ । 

आज बसेको जिल्ला कार्यसमितिको बैठकले स्थानीय तहहरुबाट आएको नामबाट छानेर तीन नगरपालिकाका उम्मेदवारहरुको सिफारिस प्रदेशमा गरेको हो । 

---

जसअन्तर्गत मेलम्ची नगरपालिकामा मेयरमा वसन्त गुरुङ  र उपमेयरमा जमुना मोक्तान तामाङ, चौतारा साँगाचोकगढीमा केशवराज गिरी मेयर र उपमेयरमा तुलसी श्रेष्ठ र बाह्रबिसे नगरपालिकामा बालकृष्ण बस्नेत मेयर र उपमेयरमा मञ्जु तामाङको नाम बागमती प्रदेश कार्यसमितिमा पठाएको हो । 

जिल्ला कार्यसमितिले नगर कार्यसमिति र क्षेत्रीय कार्यसमितिबाट आएका नामबाट छानेर प्रदेश समितिमा नाम पठाएको हो । 

कांग्रेसको विधानमा नगरपालिकाको उम्मेदवारको टुंगो प्रदेश कार्यसमितिले लगाउने व्यवस्था छ । नगर समितिले पठाएको आकांक्षीहका नामबाट प्रदेशले नगरपालिकाको मेयर र उपमेयर छान्ने विधानत व्यवस्था छ । तर क्षेत्रीय कार्यसमिति र जिल्ला कार्यसमितिको सिफारिस पनि प्रदेशले हेर्ने गरेको छ ।