गण्डकीमा कोभिड-१९ रोकथामका लागि २५ करोड खर्च

पोखरा  : विश्‍व महामारीको रुपमा फैलिएको कोभिड-१९ नियन्त्रणका लागि  गण्डकी प्रदेशमा २५ करोड २६ लाख २३ हजार तीन सय ३६ रुपैँया खर्च भएको छ । गण्डकी प्रदेश सामाजिक विकास मन्त्रालयका स्वास्थ्य महाशाखा प्रमुख रामबहादुर केसीले कोभिड-१९ रोकथाम कोषको रु ३४ करोड ७० लाख ६१ हजार दुई सय ६७ बाट हालसम्म  २५ करोड २६ लाख २३ हजार तीन सय ३६ खर्च भएको जानकारी दिए । 

डा. केसीले प्रदेशमा संक्रमितको उपचारमा खटिएका स्वास्थ्यकर्मी एवम चिकित्सकलाई पाँच करोड  २७ लाख ७३ हजार जोखिम भत्ता उपलब्ध गराइएको बताए । त्यसैगरी ४७ गाउँपालिका र नगरपालिकाका क्‍वारेन्टाइन व्यवस्थापनका लागि एक करोड ५३ लाख उपलब्ध गराइएको उनले बताए । 

---

उनले कोभिड-१९ का लागि प्रदेशका जिल्लामा आइसोलेसन, पीसीआर मेसिनदेखि अन्य आवश्यक उपकरण, भौतिक पूर्वाधार, स्वास्थ्य सामग्रीलगायतका सामान खरिदका लागि रकम खर्च भएको जानकारी दिए । प्रदेशका केही जिल्लामा उपकरण सञ्‍चालनका लागि दक्ष जनशक्तिको अभावले समस्या सृजना भएको उनको भनाइ छ । 

गण्डकी प्रदेशमा सबै भन्दा बढी संक्रमित कास्कीमा छन् । कास्कीमा ४२.९६ प्रतिशत संक्रमित छन् । त्यसपछि नवलपरासीपूर्व, तनहुँ, बागलुङ, गोर्खा, स्याङ्जा, पर्वत, लमजङु म्याग्दी छन् भने मनाङ मुस्ताङ खतरा बाहिर छ । 

महामारी बढ्दै जाँदा पोखरा महानगरपालिकाले एक सय चार शै्ययामा अक्सिजन पाइप जडान सुरु गरिएको छ । जटिल समस्या भएकाको सहज उपचारका लागि महानगरले पूर्वाधार र कर्मचारी व्यवस्थापनको लागि १९ लाख बजेट छुट्याएर काम अगाडि बढाइएको उपप्रमुख मञ्जु गुरुङले जानकारी दिइन् ।  (रासस)