पोखरा उद्योग वाणिज्य संघको मतदान सकियो, गणना भोलि

पोखरा- पोखरा उद्योग वाणिज्य संघको ३४ औं अधिवेशन अन्तर्गत नयाँ नेतृत्वका लागि भएको मतदान सकिएको छ ।

शनिबार भएको मतदानमा ८१ प्रतिशत मत खसेको निर्वाचन संयोजक तथा संघका पूर्वअध्यक्ष दिपक श्रेष्ठले जानकारी दिए । कूल ३ हजार १ सय ४३ मतदाता रहेको संघमा शनिबार भएको मतदानमा २ हजार ५ सय ४९ मत खसेको हो । शनिबार बिहान ८ बजेदेखि सुरू भएको मतदान बेलुकी ५ बजेसम्म चलेको थियो ।

---

निर्वाचन संयोजक श्रेष्ठका अनुसार आइतबारदेखि मतगणना सुरू हुनेछ । बिहान ८ बजेदेखि पोखरा उद्योग वाणिज्य संघको हलमा मत गन्‍न सुरू गरिने संयोजक श्रेष्ठले जानकारी दिए ।

संघको नेतृत्व लिन पवन प्रजापति र अर्जुन पोखरेलको प्यानल चुनावी प्रतिष्पर्धामा छन् । प्यानलबाहेक संघको पदाधिकारीमा बसेर काम गर्नका लागि स्वतन्त्र रूपमा उम्मेदवारहरू पनि छन् । स्वतन्त्र उम्मेदवारी दिनेमा वाणिज्य उपाध्यक्षमा सोभित पौडेल, महासचिवमा तारानाथ ढुंगाना चुनावी मैदानमा छन् ।

२०११ सालमा स्थापना भएको संघमा हाल २९ सदस्यीय कार्यसमितिमा रहने व्यवस्था छ । अध्यक्षसहित ७ जना पदाधिकारी, सदस्य (खुला) १०, वस्तुगतमा ४, कर्पोरेटमा २ र उद्योग १ गरी २५ सदस्य निर्वाचित हुनेछ । अध्यक्षले ४ जना सदस्य मनोनयन गर्ने अधिकार छ ।