गण्‍डकीमा मन्त्रीहरूको शपमा सभामुख र विपक्षी दलका नेता अनुपस्थित

इकागज :  पोखरा : गण्डकी प्रदेशका नवनियुक्त मन्त्रीहरूको शपथमा सभामुख नेत्रनाथ अधिकारी अनुपस्थित बनेका छन् । सामान्यतः मन्त्रीहरूको शपथमा सभामुख, विपक्षी दलको नेता उपस्थिति हुने परम्परा छ । तर गण्डकी प्रदेशमा दोस्रो पटक मन्त्रालय विस्तारमा भने सभामुख र विपक्षी दलका नेताले अनुपस्थित भएका हुन् । 

केन्द्रमा पनि अग्नि सापकोटाले प्रधानमन्त्री ओलीले मन्त्रिपरिषद् विस्तार गर्दा शपथ कार्यक्रममा उपस्‍थित हुँदैनन् । सापकोटाकै सिको गर्दै सभामुख अधिकारीले पनि गण्डकीमा मन्त्रीहरूको शपथको कार्यक्रममा नआएका हुन् । यसअघि पहिलो सरकारका बेला मन्त्री बनेका दिपक मनाङेको शपथमा पनि उनी आएका थिएनन् । तर मुख्यमन्त्री पृथ्वीसुब्बा गुरुङ दोस्रो पटक मुख्यमन्त्री नियुक्त हुँदा भने उनी शपथमा पुगेका थिए ।

---

सभामुख अधिकारीलाई सत्तारुढ एमाले सांसदहरूले पार्टी कार्यकर्ताको भूमिकामा बसेर काम गरेको आरोप लगाउँदै आएका छन् । यसअघि प्रदेश सभामा पेस भएको अविश्वास प्रस्तावमा मतदान हुने दिन विपक्षी सांसद अनुपस्थित हुँदा सभामुखले हठातमा बैठक स्थगित गरेपछि मुख्यमन्त्री स्वयंले पनि राजीनामा मागिनुपर्ने बताएका थिए । 

एमाले संसदीय दलका प्रमुख सचेतक मायानाथ अधिकारी सभामुखले संविधान अनुसार चल्नुपर्ने र पार्टी कार्यकर्ता बन्न नहुने बताउँछन् । सभामुख भइसकेपछि पार्टीको निर्देशनभन्दा पनि संविधानले दिने बाटो अनुसार सभामुख चल्नुपर्ने उनले बताए । ‘केन्द्रमा पनि सभामुखले पार्टीको निर्देशन मानेर नजानु भएको होला, यहाँ पनि पार्टीकै निर्देशनमा नजानु भएको होला,’ अधिकारीले भने, ‘सभामुख भइसकेपछि त संविधान मान्नुपर्‍यो नि, पार्टीको निर्देशन होइन ।’

आज गण्डकी प्रदेशमा मुख्यमन्त्री पृथ्वीसुब्बा गुरुङले मन्त्रिपरिषद् विस्तार गरेका छन् । २९ वैशाखमा मुख्यमन्त्रीमा दोस्रो पटक नियुक्त भएका मुख्यमन्त्री गुरुङले आज मन्त्रिपरिषद् विस्तार गरेका हुन् । 

मुख्यमन्त्री गुरुङले पहिलाको सरकारमा एमालेबाट सहभागी मन्त्रीलाई नै दोहोर्‍याएका छन् । यसअघिको सरकारमा सहभागी एमालेका किरण गुरुङ (अर्थ मन्त्रालय), रामशरण बस्नेत (भौतिक पूर्वाधार), नरदेवी पुन: (सामाजिक विकास) र विकास लम्साललाई (उद्योग, पर्यटन वन तथा वातावरण) नै मुख्यमन्त्रीले निरन्तरता दिएका छन् । स्वतन्त्र निर्वाचित सांसद दीपक मनाङे पनि युवा तथा खेलकुद मन्त्रीमा दोहोरिएका छन्  । 

अहिले किरण गुरुङलाई अर्थ मन्त्रालय र मनाङेलाई युवा तथा खेलकुद मन्त्रीको जिम्मा दिइएको छ । बाँकी मन्त्री भने अहिलेलाई विना विभागिय मन्त्री तोकिएको र उनीहरूको जिम्मेवारी केही दिनमा टुङ्गो लगाइने मुख्यमन्त्री स्रोतले बतायो ।

सरकारका प्रवक्तामा रामशरण बस्नेत नियुक्त भएका छन् । पहिलो मन्त्रीपरिषद् बैठकबाट बस्नेत प्रवक्ता चुनिएका हुन् । यस्तै गुरुङले राजनीतिक सल्लाहकार हेरफेर गरेका छन् । उनले उक्त पदमा लमजुङ सुन्दरबजारका डा‍.भीष्म अधिकारीलाई नियुक्त गरेका छन् । अधिकारीको नियुक्तिसँगै यसअघिका सल्लाहकार गोविन्दबहादुर नेपाली पदमुक्त भएका छन् । सल्लाहकार अधिकारी संविधान सभा सदस्य हुन् । नेपाली नेकपा एमाले गण्डकी प्रदेश कमिटीका सचिव छन् ।