गण्डकी प्रदेशले बनायो कोभिड-१९ सहजीकरण समन्वय समिति

पोखरा : गण्डकी प्रदेशले कोभिड-१९ सम्बन्धी सहजीकरण तथा समन्वय समिति गठन गरेको छ । गण्डकी प्रदेशका स्वास्थ्य निर्देशक विनोदबिन्दु शर्माको अध्यक्षतामा ७ सदस्यीय प्रदेशस्तरीय समिति गठन भएको सामाजिक विकास मन्त्रालयको स्वास्थ्य महाशाखा प्रमुख डा. राम केसीले जानकारी दिए । ‘प्रदेशका जनताले अस्पतालमा बेड खोज्दै भौतारिनु पर्ने अवस्थाको अन्त्य गर्न समिति गठन गरेका छौं,’ डा. केसीले भने ।
 
समितिमा मन्त्रालयका प्रतिनिधि, पोखरा स्वास्थ्य विज्ञान प्रतिष्ठानका प्रमुख अर्जुन आचार्य, मनिपाल अस्पताल, चरक मेमोरियल अस्पताल, गण्डकी मेडिकल कलेज, फिस्टेल अस्पतालका निर्देशक सदस्य छन् । 

समितिले पोखराका निजी अस्पतालसँग दिनको २ पटक अस्पतालहरूका बेड संख्या, बिरामी संख्याबारे तथ्य संकलन गर्नेछ । यसका लागि अस्पतालहरुमा फोकल पर्सन चुनिएको केसीले बताए । 

---

प्रदेशमा निजी अस्पतालले बिरामी लिन नमान्ने घटना बढेपछि प्रदेशकी सामाजिक विकास मन्त्री नरदेवी पुनको निर्देशनमा समिति बनाइएको हो । पोखरामा बेड नपाएर बिहीबार स्याङ्जाकी धनमाया गुरुङको मृत्यु भएपछि मन्त्री पुनले बैठक राखेर समन्वय समिति बनाएकी हुन् । 

बैठकमा कोभिडबाट मृत्यु हुनेको शव व्यवस्थापनलाई कसरी छिटोछरितो बनाउनेबारे पनि छलफल भएको थियो । त्यस्तै बेड अवस्थाबारे अस्पतालका फोकल व्यक्तिबाट लिइएको सूचनालाई बिरामीसँग पु¥याउने गरी कल सेन्टर बनाउने निर्णय पनि बैठकले गरेको छ ।