साँघुरो चाइना पुल नजिकै ‘सिग्नेचर ब्रिज’

पोखरा- पोखरा पृथ्वीचोक नजिकैको चाइना पुल पछिल्लो निकै साँघुरो भइसकेको छ । सवारी चापका कारण यो पुल निकै व्यस्त हुँदै गएको छ । जसले दुर्घटनाको जोखिम बढ्दैछ । पुल सानो अनि बाटो चाक्लो बन्दा ट्राफिकलाई सवारी चाप कम गर्न हम्मेहम्मे पर्छ । स्थानीय त्यहाँ अर्को पुल आवश्यक रहेको बताइरहेका छन् । तर, लामो समयसम्म बनेको छैन । मानिसहरू सवारी जामको झमेला झेल्न बाध्य छन् । 

सोही स्थानमा अब पुल बन्ने पक्का भएको छ । ढिलो चाँडो पुल बन्नेमा स्थानीय तथा सवारी चालक ढुक्क बनेका छन् । किनकि, शनिबार साँघुरो चाइना पुल नजिकै अर्को नयाँ पुलको शिलान्यास भएको छ । पोखरा–मुग्लिन राजमार्ग सुधार चरण–१ योजना अन्तरगत पोखरा महानगरपालिका वडा नम्बर ९ र १० जोड्ने सेती नदी पुलको शिलान्यास गरिएको हो ।

---

अहिले रहेको पुल दायाँबायाँ दुवैतर्फ सिग्नेचर ब्रिज बन्ने भएको हो । पुलको नेपाल सरकारका भौतिक पूर्वाधार तथा यातायात मन्त्री प्रकाश ज्वालाले शिलान्यास गरेका हुन् ।

पुल निर्माणको कार्य २०८२ भाद्र २१ गतेभित्र सम्पन्न गर्ने गरी रसुवा कन्स्ट्रक्सन प्रा.ली काठमाडौँले ठेक्का पाएको छ । यस अवधिमा सेतीमा मौजुदा पुलको दायाँबायाँ १९०/१९० मिटरका २ वटा पुलहरू निर्माण हुने छन् । नेपालकै नमुना पुलका रूपमा रहने यो पुलको डिप फाउण्डेसन हुनेछ । पुलको कुल लागत १ अर्ब ७ करोड २४ लाख २६ हजार ५ सय रुपैयाँ (भ्याटसहित) रहेको छ ।

पुलको शिलान्यास गर्दै मन्त्री ज्वालाले तोकिएको समयमा पुल निर्माण कार्य सम्पन्न गर्न निर्माण व्यवसायी लगायत सरोकारवालाहरूलाई निर्देशन दिए । पुलले पोखराको सुन्दरतामा नयाँ आयाम थप्ने उनको भनाइ थियो । 

कास्की क्षेत्र नम्बर–२ की प्रतिनिधि सभा सदस्य विद्या भट्टराई अधिकारीले निर्माणका क्रममा आउने बाधा अवरोध फुकाउन सबै एकजुट हुनुपर्ने बताइन् । उनले भनिन्, ‘निर्माणका क्रममा अवरोध आउन सक्छन् । त्यसैले जनता र राज्यबीच देखिने अवरोध हटाउन राज्यका निकाय, जनप्रतिनिधि र स्थानीयबीच सहकार्य गरौँ ।’

पोखरा महानगरपालिकाका प्रमुख धनराज आचार्यले पुल निर्माणका क्रममा आउन सक्ने सबैखाले स्थानीय अवरोधहरूको समाधान गरिदिने बताए । स्थानीय अवरोधका कारण पुल निर्माण कार्यलाई ढिलाइ हुन नदिने उनको प्रतिबद्धता थियो । सेती नदीमाथि बन्ने सिग्नेचर ब्रिजले पोखराको थप सौन्दर्यता बढाउने प्रमुख आचार्यको विश्वास छ ।