गण्डकीमा थपिए ४०६ जना कोभिड-१९ संक्रमित

पोखरा : गण्डकी प्रदेशमा आइतबार ४ सय ६ जना कोभिड-१९ का संक्रमित थपिएका छन् । प्रदेशको ९ जिल्लामा गरी यती संक्रमित थपिएका हुन् । थपिनेमध्ये ६९.७ प्रतिशत अर्थात २ सय ८३ जना कास्की जिल्लाका छन् । 

तनहुँमा ५१ संक्रमित, नवलपरासीमा ३१, लमजुङमा १८, पर्वतमा १२, गोरखा र स्याङ्जामा ११/११, बागलुङमा ९ र म्याग्दीमा ७ संक्रमित थपिएका छन् । 

---

आइतबार प्रदेशमा एकैदिन धेरै व्यक्तिमा संक्रमण पुष्टि भएको हो । यस अगाडि १४ कात्तिकमा प्रदेशमा २ सय ६९ जनामा कोरोना संक्रमण पुष्टि भएको थियो । त्यसदिन कास्कीमा १ सय ८३ संक्रमित थपिएका थिए । आइतबार भने १४ गतेका कुल संक्रमितभन्दा झन्डै दोब्बर संक्रमित थपिएका हुन् । 

गण्डकीमा कुल कोरोना संक्रमितको संख्या ७ हजार ७ सय ४० पुगेको छ । तीमध्ये ४ हजार २ सय २१ जना निको भएका छन् भने ८० जनाको मृत्यु भएको छ । 

प्रदेशमा आइतबार ४ संक्रमितको मृत्यु भएको छ । कास्कीका २ र नवलपरासीका २ संक्रमितको मृत्यु भएको स्वास्थ्य निर्देशनालय गण्डकी प्रदेशले जानकारी दिएको छ । 

पोखरा १७ का ६० वर्षीय कोरोना संक्रमित पुरुषको पश्चिमाञ्चल क्षेत्रीय अस्पतालमा उपचारका क्रममा मृत्यु भएको हो । कात्तिक ११ गते कोरोना संक्रमण पुष्टि भएर आईसियुमा रहका उनको आइतबार बिहान निधन भएको हो । उनमा कोरोनासहित निमोनिया र मधुमेहको समस्या थियो ।

कात्तिक ४ गते कोरोना संक्रमण पुष्टि भएर आइसियुमा उपचाररत अन्नपूर्ण गाउँपालिका ३ का ४७ वर्षीय पुरुषको पश्चिमाञ्चल क्षेत्रीय अस्पतालमा शनिबार राति निधन भएको हो । उनमा निमोनियाको पनि समस्या थियो ।

नवलपुरको कावासोती नगरपालिका ६ का ६७ वर्षे पुरुष र गैंडाकोट नगरपालिका २ का ७७ वर्षीया महिलाको शनिबार होमआइसोलेसनमा मृत्यु भएको हो ।