रुपन्देहीमा थप दुई संक्रमितको मृत्यु

बुटवल : कोभिड १९ संक्रमणका कारण रुपन्देहीमा सोमबार दुई जनाको मृत्यु भएको छ । उनीहरूको बुटवलको कोरोना विशेष अस्पताल बुटवल र भैरहवाको भीम अस्पतालमा मृत्यु भएको हो । बुटवलको कोरोना बिशेष अस्पतालमा ४५ वर्षीय पुरुषको मृत्यु भएको हो । बुटवल उपमहानगरपालिका १७ का ४५ वर्षीय पुरुषको सोमबार बिहान मृत्यु भएको लुम्बिनी प्रादेशिक अस्पताल बुटवलले जनाएको छ । 

स्वास्थ्यमा समस्या देखिएपछि लुम्बिनी प्रादेशिक अस्पताल पुगेका उनमा कोरोना संक्रमण पुष्टि भएपछि उपचार थालिएको थियो । कोरोना पुष्टि भएसंगै कोरोना बिशेष अस्पतालमा भर्ना गरिएकोमा सोमबार मृत्यु भएको अस्पतालका प्रवक्ता डा. विष्णु गौतमले जानकारी दिए । उनीमा कोरोना संक्रमणसहित मृगौला र पित्तको समेत समस्या रहेको डा. गौतमले बताए ।

---

यस्तै भैरहवाको भिम अस्पतालमा अर्का एक संक्रमितको मृत्यु भएको छ । सैनामैनाबाट उपचारका लागि भीम अस्पतालमा भर्ना भएकी ५६ वर्षीया महिलाको सोमबार बिहान मृत्यु भएको अस्पतालले जनाएको छ । 

कार्तिक १७ गते कोरोना संक्रमण पुष्टि भएका उनी १९ गते अस्पतालमा भर्ना भएकी थिइन् । मधुमेहको समेत समस्या रहेकी उनको उपचारकै क्रममा मृत्यु भएको अस्पतालका सूचना अधिकृत डा. नारायण पोखरेले जानकारी दिए । यो संगै रुपन्देहीमा मृतकको संख्या ८१ जना पुगेको छ । अस्पतालमा अहिले पनि गम्भीर प्रकृतिका बिरामीहरु बढ्दै गएको कोरोना बिशेष अस्पतालले जनाएको छ ।