लुम्बिनीमा मुख्यमन्त्री पोखरेलविरुद्ध तीन दल एक ठाउँमा

बुटवल : लुम्बिनी प्रदेश सरकार परिवर्तनका लागि एमालेइतरका तीन दल सहमत भएका छन् । नेकपा माओवादी केन्‍द्र, नेपाली कांग्रेस र जनता समाजवादीबीच छलफल जारी छ । तीनै दल लुम्‍बिनी सरकार परिवर्तन गर्न सहमत भएका हुन् ।

रातिदेखि छलफलमा रहेका उनीहरूले हाल सांसदहरूको हस्ताक्षर संकलन सुरु गरेका छन् । बैठकमा सहभागी माओवादी केन्‍द्रका एक प्रदेश सांसदकाअनुसार माओवादी र कांग्रेसका सांसदहरूले हस्‍ताक्षर गरिसकेका छन् भने जसपाका सांसदहरूको हस्‍ताक्षर संकलनको कार्य जारी छ । उनकाअनुसार जसपाका चार जना सांसदले हस्‍ताक्षार गरिसकेका छन् । बाँकीको संकलन गर्ने काम भइरहेको उनले बताए । 

---

८७ सदस्यीय प्रदेशसभामा नेकपा एमालेका ४१, माओवादी केन्द्रका २०, नेपाली कांग्रेसका १९, जसपाका ६ र राष्ट्रिय जनमोर्चाका १ सदस्य छन् । मुख्यमन्त्री शंकर पोखरेललाई सरकार जोगाउन वा उनी विरुद्धको अविश्‍वास प्रस्‍ताव पारित हुन ४४ मत आवश्यक पर्छ । माओवादी र एमाले अलग भएपछि माओवादी केन्द्रका दुई जना सांसद एमालेमा लागेका छन् । एमालेमा लागेका दुई प्रदेश सभा सदस्यलाई माओवादी केन्द्रले कारबाही गरेको छ । अब माओवादी केन्द्रसँग लुम्बिनी प्रदेशसभामा १८ सांसद कायम रहनेछन् ।