टिप्परले जन्ती बसलाई ठक्कर दिँदा दुई बालिकाको मृत्यु

बुटवलः रुपन्देहीको कोटिहवामा टिप्परले जन्ती बसलाई ठक्कर दिँदा दुई बालिकाको ज्यान गएको छ । दुर्घटनामा ६ जना गम्भीर घाइते भएका छन् । सिद्धार्थ राजमार्ग अन्तर्गत बुटवल बेलहिया सडक खण्डको कोटिहवामा भएको दुर्घटनामा बसमा सवार रुपन्देहीको तिलोत्तमा १५ कि १० वर्षीया सरस्वती हरिजन र ८ वर्षीया गंगा हरिजनको मृत्यु भएको हो । 

भैरहवाबाट बुटवलतिर आउँदै गरेको जन्ती बोकेको लु १ ख ९६८५ नम्बरको बसलाई भैरहवा तर्फबाटै नै बुटवल आउदै गरेको लु १ ख ६०६४ नम्बरको टिप्परले पछाडीबाट ठक्कर दिँदा दुर्घटना भएको थियो । 

---

टिप्परले पछाडीबाट ठक्कर दिएपछि हुत्तिएको बसले जन्ती बोकेकै लु १ ख ५७८८ नम्बरको बसलाई समेत ठक्कर दिएको थियो । सो बस अनियन्त्रित भई लु २ च ७०७२ नम्बरको बोलेरो जीपलाई ठक्कर दिएको प्रहरीले जनाएको छ ।

दुर्घटनामा परी टिप्पर चालकसहित ६ जना घाइते भएको लुम्बिनी प्रदेश ट्राफिक प्रहरी कार्यालय बुटवलले जनाएको छ । घाइतेमध्ये टिप्पर चालकको भैरहवास्थित युनिभर्सल मेडिकल कलेजमा र अन्य पाँच जनाको मणिग्रामस्थित क्रिमसन अस्पतालमा उपचार भइरहेको छ ।