चुनावको मौका छोपेर भारतले थाल्यो दशगजामा एकलौटी पर्खाल निर्माण (तस्बिरहरू)

बुटवल- नेपाल भारत सीमा नाका अन्तरगत रुपन्देहीको पक्लिहवामा भारतले एकलौटी रुपमा पर्खाल लगाएपछि विवाद शुरु भएको छ । रुपन्देहीको सिद्धार्थनगर नगरपालिका-१ पक्लिहवा नजिकको दशगजा क्षेत्रमा भारतले एकलौटीरूपमा पर्खाल निर्माण थालेको हो ।

---

दशगजासँगै जोडिएर एकलौटीरूपमा पर्खाल निर्माण गर्न लागेपछि स्थानीय प्रशासनमा जानकारी गराएका छन् । भारतीय सुरक्षाकर्मी एसएसबीले भारतमा एकीकृत जाँचचौकी (आईसीपी) निर्माणका लागि भन्दै ठूलो क्षेत्रमा पर्खाल लगाउन थालेको छ ।

सशस्त्र प्रहरीको जिल्ला कार्यालयको अगाडि नै भारतले दशगजाभर इँटा खसालेको छ । पिलर नम्बर ५१९ को छेवैमा जग खनेर पर्खाललाई आवश्यक पिलर पनि ठड्याइसकेको छ ।

नेपाल निर्वाचनमा होमिएको समयमा भारतले एकलौटीरूपमा बनाउन लागेको पर्खालमा नेपाली प्रशासनले आपत्ति जनाएको छ । निमार्ण कार्यप्रति आपत्ति जनाएको रुपन्देहीका सहायक प्रमुख जिल्ला अधिकारी रामचन्द्र अर्यालले बताए ।

‘सशस्त्र प्रहरीले जिल्ला प्रशासन कार्यालयलाई भारतले निर्माण गरेको पर्खालबारे जानकारी गराएको थियो,’ अर्यालले भने, ‘हामीले तत्काल गृह मन्त्रालयलाई खबर गर्‍यौँ र भारतीय पक्षलाई निर्माण कार्य रोक्न लगायौँ ।’ दशगजा क्षेत्रमा कुनै पनि काम गर्दा दुवै देशले अर्का देशको अनुमतिले मात्र निर्माण गर्न पाइने प्रावधान छ । तर, भारतीय पक्षले यसको पालना नगरेको सहायक प्रजिअ अर्यालको भनाइ छ ।