निषेधाज्ञामा रुपन्देही : बजार सुनसान, बेकाममा हिड्नेहरूमाथि कडाई

बुटवल : कोभिड-१९ संक्रमणको दोस्रो लहरको ‘चेन ब्रेक’ गर्न आज बिहीबारदेखि १५ दिनसम्मका लागि जिल्ला प्रशासन कार्यालय रुपन्देहीले जिल्लाभर निषेधाज्ञा जारी गरेको छ । अत्यावश्यक कामबाहेक अन्य कुनै पनि प्रयोजनका लागि हिँडडुल गर्न नपाइने गरी जारी गरिएको निषेधाज्ञाको पहिलो दिन आज बिहानैबाट मुख्य सहर बुटवल, भैरहवालगायत सुनसान बनेका छन् ।

मानिसहरूको आवतजावत र जमघट हुन नदिन सहरका मुख्य सडकमा सुरक्षाकर्मीको उपस्थिति बाक्लो छ । बिहानैदेखि मजदुरी गर्न हिँड्ने मानिस र फेरीवालाहरू सडकमा देखिएका छैनन्, भिड निकै कम छ । हाटबजारमा निषेधाज्ञाको अवज्ञा गर्दै खुलेका केही कपडा पसलहरू बुटवल उपमहानगरपालिकाको नगर प्रहरीले बन्द गराएको छ । मिलनचोक र बसपार्कमा खुलेका केही पसलहरू पनि सुरक्षाकर्मीले बन्द गराएका छन् । 

---

यता पुष्पलाल पार्कमा ठेलामा फलफूल बेच्‍न हिँडेका व्यापारीलाई प्रहरीले सोधपुछ गरी घर फर्कायो । बसपार्क पछाडी देखिएको मानिसहरूको चहलपहललाई खटिएका प्रहरी जवान गौरब भुषालले ईरिक्सा, रिक्सा र सामान्य हिँडडुलसमेत रोक्न आफूहरूलाई निर्देशन आएको बताए ।

सुरक्षाकर्मीका प्रयासका बाबजुद बुटवलका भित्रि सडकमा भने केही ईरिक्सा तथा रिक्साहरू यात्रु बोकेर हुँइकिरहेका छन् । ती बाहेक दुध, तरकारी तथा औषधी पसलहरू सञ्चालन भइरहेका छन् । तिनकुने चोकको सडक किनारमा भूइँमा राखिएका तरकारी पसलहरूमा किन्‍नेहरूको केही जमघट देखिन्छ । परिचय पत्र बोकेका अत्यवश्यक कामदारलाई भने आवतजावतमा रोकिएको छैन ।

गत चैत ११ गतेदेखि रुपन्देही लगायत देशैभर पहिलोपटक ‘लकडाउन’ गरिएको थियो । दोस्रो पटक संक्रमण बढ्‍दै गएपछि रुपन्देहीमा जिल्ला प्रशासनले बैशाख ३० गते विहान ६ बजेसम्मका लागि फेरि निषेधाज्ञा जारी गरेको छ । यसअघि कोभिड-१९ व्यवस्थापन सञ्चालन केन्द्र (सीसीएमसी)ले निर्णय गर्दै पाँच सयभन्दा धेरै सक्रिय संक्रमित भएका जिल्लाहरूमा प्रशासन आफैले निषेधाज्ञा जारी गर्न सक्ने बताएको थियो । रुपन्देहीमा सक्रिय संक्रमितहरूको संख्या एक हजार नाघेपछि संक्रमणको ‘चेन ब्रेक’ गर्न जिल्ला प्रशासनले निषेधाज्ञा जारी गरेको जिल्ला प्रशासन कार्यालयका प्रशासकीय अधिकृत जनक थापाले बताए ।