लुम्बिनीले पनि आज मुख्यमन्त्री पाउँदै, सत्तागठबन्धनले दाबी पेश गर्दै

बुटवल- लुम्बिनी प्रदेश सरकारमा दावी पेस गर्ने आज अन्तिम दिन हो । प्रदेश प्रमुख अमिक शेरचनले दलहरूलाई सरकारमा दावी पेस गर्न दिएको समयसीमा आज ४बजे सकिँदै छ ।

मंगलबार नै सरकारमा दावी पेस गर्ने तयारी भए पनि सांसदहरूको हस्ताक्षर नपुगेपछि सत्ता गठबन्धनले दावी पेस गर्न सकेनन् । माओवादीले आधा कार्यकाल मुख्यमन्त्री पाउने सहमती केन्द्रमा भएसँगै आज सरकारको दावी गर्ने तयारी छ। 

---

एमाले नेता भूमिश्वर ढकालका अनुसार विभिन्न दलका सांसदहरू बाहिर रहेकाले हस्ताक्षर रोकिँदा मंगलबार तय गरिएको मुख्यमन्त्रीमा दावी गर्ने कार्यक्रम स्थगित गरिएको थियो ।

प्रदेशको नेतृत्व पूरा कार्यकाल नेकपा (एमाले)लाई दिने निर्णय गरेपछि नेकपा (माओवादी केन्द्र)मा असन्तुष्टि देखिएको छ । माओवादी केन्द्रका संसदीय दलको नेता जोखबहादुर महरा सरकारको नेतृत्व आधा–आधा कार्यकालको हुनुपर्ने मागसहित काठमाडौँमा छन् । तर, ढकालले माओवादीको आन्तरिक असन्तुष्टिको विषय समाधान भएसँगै आज मध्याह्न १२ बजेतिर मुख्यमन्त्रीमा दावी गर्ने तयारी गरिएको बताए । सत्ता गठबन्धनमा आबद्ध दलको बैठकले मंगलबार नै बहुमत सांसदको हस्ताक्षरसहित सरकारमा दावी पेस गर्ने निर्णय गरेको थियो ।

नागरिक उन्मुक्ति पार्टी बाहेकका सत्ता गठबन्धनमा आवद्ध दलहरूको बैठकले गिरीलाई मुख्यमन्त्रीमा नियुक्त गर्न दावी पेश गर्ने निर्णय गरेका थिए । लुम्बिनी प्रदेशमा एमालेका २९, माओवादी केन्द्रका १०, राप्रपाका ४, जसपा र जनमतका ३-३ सिट छन् ।

नागरिक उन्मुक्तिसँग ४ सिट र स्वतन्त्र २ जना सांसद रहेका छन् । ८७ सदस्यीय प्रदेशसभामा बहुमतका लागि ४४ सीट आवश्यक पर्छ । प्रदेशमा कांग्रेसका २७, लोसपाका ३ र नेकपा एकीकृत समाजवादी र राष्ट्रिय जनमोर्चाका १-१ सदस्य छन् । ती दलहरुले सरकार गठन बारे कुनै निर्णय सार्वजनिक गरेका छैनन् ।