कोभिड-१९ संक्रमणबाट बाँकेमा थप एकको मृत्यु

बाँके : कोभिड-१९ संक्रमणबाट बाँकेमा शनिबार एक जनाको मृत्यु भएको छ । भेरी अस्पताल नेपालगञ्‍जमा उपचारार्थ बाँके कोहलपुर नगरपालिका वडा नं. ११ की ६८ वर्षीया महिलाको मृत्यु भएको हो ।

स्वासप्रश्वासमा समस्या आएपछि उनलाई कार्तिक २८ गते नेपालगञ्‍ज मेडिकल कलेज शिक्षण अस्पतालमा भर्ना गरिएको थियो । कार्तिक २९ गते कोभिड रिपोर्ट पोजेटिभ आएपछि आफन्तको अनुरोधमा उनलाई मंसीर १ गते भेरी अस्पतालमा भर्ना गरि उपचार शुरु गरिएको थियो ।

---

कोभिड-१९ संकट व्यवस्थापन केन्द्र बाँकेका फोकल पर्सन नरेश श्रेष्ठका अनुसार, रोगको प्रकृतिअनुसार प्लाज्मा थेरापीलगायत सबै उपचार गर्दासमेत स्वास्थ्यमा सुधार नआएकी उनको शनिवार मृत्यु भएको हो । योसँगै बाँकेमा कोभिडबाट ज्यान गुमाउनेको संख्या ३८ पुगेको छ ।