गौतम बुद्धमा कतार एयरवेजको उडान बन्द : ३८ उडानमा ९३ यात्रु भैरहवा झरे, १२०३ यात्रु काठमाडौँमा

भैरहवा- कतार एयरवेजले भैरहवास्थित गौतम बुद्ध अन्तर्राष्ट्रिय विमानस्थलमा गर्दै आएको उडान बन्द गरेको छ।

कतारले २७ कात्तिकदेखि १५ मंसिरसम्मका लागि मात्र भैरहवा उडान गर्ने अनुमति लिएको थियो।

---

२३ कात्तिकदेखि काठमाडौँमा आधा उडान कटौती भएपछि कतारले भैरहवामा दैनिक एउटा ‘टचडाउन फ्लाइट’ गर्दै आएको थियो।

कतारले वाइडबडी एयरबस ३३० विमानबाट दोहा–भैरहवा–काठमाडौँ–दोहा उडान गरेको थियो। आइतबारदेखि कतारको भैरहवा उडान बन्द भएको गौतम बुद्ध अन्तर्राष्ट्रिय विमानस्थलले जानकारी दिएको छ । कतारको सेवा बन्द भएपछि भैरहवामा नियमित अन्तर्राष्ट्रिय उडान गर्ने वायुसेवा चारमा झरेका छन्।

नेपाल नागरिक उड्डयन प्राधिकरण (क्यान)ले १५ मंसिरपछि पनि भैरहवा उडानका लागि प्रस्ताव पेस गर्न कतार एयरवेजलाई पत्राचार गरेको थियो। तर, कतारले भैरहवा उडानका लागि प्रस्ताव पेस नगरेको क्यानका सहप्रवक्ता ज्ञानेन्द्र भुलले बताए। कतारले छलफल गरेर जानकारी पठाउने जवाफ फर्काएको उनको भनाइ छ। कतारको भैरहवा उडान फेरि अनिश्चित बनेको छ।

कतारले काठमाडौँमा दैनिक चार वटा उडान गर्दै आएको थियो। दैनिक १० घण्टा (राति १० बजेदेखि बिहान ८ बजेसम्म) त्रिभुवन विमानस्थल बन्द गरेर स्तरोन्नतिका काम सुरु गरेपछि कतारका दुई वटा उडान कटौती भएका थिए । आधा उडान कटौती भएपछि कतारले एउटा उडान भैरहवालाई टच गरेर काठमाडौँमा गर्दै आएको थियो। ‘भैरहवा उडानसहित कतारले काठमाडौँमा दैनिक तीन उडान गर्दै आएको थियो,’ क्यानका सहप्रवक्ता भुलले भने, ‘भैरहवामा उडान नगरेपछि कतारको दोहा–काठमाडौं उडान पनि दुई वटामा झरेका छन्।’

अहिलेसम्म कतारले भैरहवामा ३८ वटा उडान–अवतरण गरेको छ। जसमार्फत ९३ जना यात्रु मात्र भैरहवा झरेका छन् भने १२ सय तीन यात्रु दोहाबाट भैरहवा ट्रान्जिट भएर काठमाडौँ झरेका छन्। यसबीचमा दोहा जानका लागि भैरहवाबाट एक जना पनि यात्रु नचढेको भैरहवा विमानस्थलको तथ्यांकले देखाएको छ। भैरहवामा अहिले एयर एसिया, फ्लाई दुबई, जजिरा एयरवेज र नेपाल वायुसेवा निगमले मात्र नियमित अन्तर्राष्ट्रिय उडान गरिरहेका छन्।