बाँकेको बनियाँ गाउँमा झडप, एकको मृत्यु

नेपालगन्ज : बाँकेको जानकी गाउँपालिका बनियाँ गाउँमा भएको झडपमा एकको मृत्यु भएको छ । गुरुवा गाउँ मेलामा सामान्य विवादका कारण भएको झडपमा परी बनियाँ गाउँका धनीराम यादवको मृत्यु भएको हो ।

त्यस्तै झडपमा ५ जना घाइते भएका छन् भने यादव मृत्युको घटनामा संलग्न ४ जनालाई प्रहरीले पक्राउ गरेको छ । झडपमा परी स्थानीय पञ्चराम यादव, मुन्ना खटिक, राम नारायण गुप्ता, मनदेवी काँदु, पर्वत काँदु घाइते भएको बाँकेका प्रहरी प्रमुख ओम रानाले जानकारी दिए ।

---

अहिले पनि उक्त गाउँमा ठूलो संख्यामा जनपद र सशस्त्र प्रहरी परिचालन गरिएको छ । हरेक वर्ष पूर्णिमाका दिन सो ठाउँमा ‘गुरुवा गाउँ’ मेला लाग्ने गर्छ ।