आइसियुबाट कोरोना संक्रमित बेपत्‍ता

बुटवल : रुपन्देहीमा केहि समयअघि अस्पतालको शौचालयमा संक्रमित मृत फेला परेको घटना सेलाउन नपाउँदै बुटवलको कोरोना अस्पतालको आइसियुबाटै एक संक्रमित फरार भएका छन् । बुटवलस्थित कोरोना विशेष अस्पतालबाट आइतबार विहान विरामी बेपत्ता भएका हुन् ।

निमोनियाका रोगी बुटवलका ५५ वर्षीय पुरुष लुम्बिनी प्रादेशिक अस्पतालमा उपचारका लागि गएकोमा पिसिआर परीक्षण गर्दा रिपोर्ट पोजेटिभ आएपछि कोरोना विशेष अस्पतालमा भर्ना भएका थिए । गत बुधबार कोरोना पुष्टि भएसँगै अस्पतालको आइसियु कक्षमा भर्ना भएका उनलाई अस्ति मात्रै प्लाज्मा चढाइएको थियो ।

---

अस्पतालबाट भागेका उनी घरमा पनि पुगेका छैनन् । अस्पतालको लापरबाहीका कारण उनी हराएको परिवारको आरोप छ । आईसीयुमा भर्ना भएका संक्रमित पिसाब फेर्न बाहिर आउनै नसक्ने संक्रमितकी श्रीमतीले बताइन् । ‘बेडमा चढाईएको सलायन नफेरेर सबै रगत फर्क्यो, मलाई मार्ने भए, मलाई लिन आउ भनेर फोन आएको थियो । हामीले भोली डाक्टरसँग सल्लाह गरेर आउँछौं भन्यौं’ संक्रमितकी श्रीमतीले भनिन् ।

बिहान पिसाब फेर्न गएका ती संक्रमित शौचालयबाटै जङ्लतिर भागेको अस्पतालका फोकल पर्सन डा. सुदर्शन थापाले जानकारी दिए । ‘उहाँले हिजो साँझदेखि नै घर जाने इच्छा व्यक्त गर्नुभएको थियो । उपचार नसकिएको हुनाले हामीले डिस्चार्ज दिएनौं,’थापाले भने । ‘अस्पतालले घर जान नदिएपछि भाग्‍नुभएको हुन सक्छ ।’ अस्पतालको पछाडिबाट जंगलतिर भागेका उनलाई त्यहाँका कर्मचारी र कुरुवाहरुले केहिबेर पिछा गरे पनि राजमार्ग पार गरेर जंगल पसेपछि नियन्त्रणमा लिन नसकिएको उनले बताए । अस्पतालबाट बेपत्ता भएका उनलाई खोजी सुरक्षाकर्मीहरुको सहयोगमा खोजी कार्य भइरहेको अस्पतालले बताएको छ ।