बाँकेमा कोरोनाबाट थप तीनको मृत्यु

बाँके : कोरोना भाइरस संक्रमणबाट बाँकेमा थप तीन जनाको मृत्यु भएको छ । बाँकेका दुई जना र बर्दियाका एक जनाको कोरोनाका कारण मृत्यु भएको हो । कोभिड-१९ संकट व्यवस्थापन केन्द्र बाँकेका सूचना अधिकारी तेज वलीका अनुसार भेरी अस्पताल नेपालगन्जमा दुई जना र एक जनाको सैनिक अस्पताल नेपालगन्जमा मृत्यु भएको हो ।

सैनिक अस्पतालमा नेपालगन्ज उपमहानगरपालिका २० राँझाका ६६ वर्षीय पुरुषको मृत्यु भएको हो । स्वास्थ्यमा समस्या आएपछि ती पुरुषको पौष ७ गते भेरी अस्पतालमा कोभिड परीक्षण गरिएको थियो । उनको पौष गते रिपोर्ट पोजिटिभ आएको कोभिड संकट व्यवस्थापन केन्द्रले जनाएको छ ।

---

जानकारी अनुसार उनलाई त्यसै दिन सैनिक अस्पतालमा भर्ना गरेर रोगको प्रकृति अनुसार उपचार सुरु गरिएको थियो । तर विरामीको अवस्थामा सुधार नआएपछि उपचारकै क्रममा बुधबार विहान ६:३० बजे मृत्यु भएको अस्पतालले जनाएको छ । उनी सैनिक जवानका बुवा हुन् ।

यस्तै भेरी अस्पतालमा उपचारका क्रममा कोहलपुर नगरपालिका-२ का ७३ वर्षीय पुरुषको मंगलवार राती मृत्यु भएको छ ।  पाँच गते कोरोना पुष्टि भएका ती पुरुषको उपचारका क्रममा राती १०:२० बजे मृत्यु भएको अस्पतालले जनाएको छ ।

कोरोना पुष्टि भएलगत्तै उनलाई नेपालगन्ज मेडिकल कलेज कोहलपुरको कोभिड आइसोलेसन वार्डमा भर्ना गरेर उपचार सुरु गरिएको थियो । तर स्वास्थ्य अवस्थामा सुधार नआएपछि उनलाई त्यहाँबाट रिफर गरेर भेरी अस्पताल पठाइएको थियो । बाँकेमा कोरोना भाइरस संक्रमणबाट ज्यान गुमाउनेको संख्या ४५ पुगेको छ ।

यस्तै भेरी अस्पतालमै उपचारका क्रममा बर्दिया ठाकुरबाबा नगरपालिका-९ की ८५ वर्षीया महिलाको पनि मृत्यु भएको छ । स्वास्थ्यमा समस्या आएपछि ती महिला १२ गते अस्पताल भर्ना भएकी थिइन् । कोरोनासँग मिल्दोजुल्दो लक्षण देखिएपछि उनको त्यसै दिन पीसीआर परीक्षण गर्दा रिपोर्ट पोजिटिभ आयो ।

रोगको प्रकृति अनुसार सबै प्रकारको उपचार गर्दा गर्दै उनको गएराती १०:२५ बजे मृत्यु भएको अस्पतालले जनाएको छ । योसँगै बाँकेमा उपचारका लागि आएका बाहिरी जिल्लाका ७७ जनाको मृत्यु भएको छ ।