मर्चवारमा आगो लगाएर युवाको हत्या, शव पहिचान अझै भएन

बुटवल : नेपाल-भारत सीमा नाका पर्ने रुपन्देहीको मर्चवारमा एक युवाको हत्या भएको छ । शरीरमा मट्टितेल खन्याएर आगो लगाएर हत्या गरिएको अवस्थामा मायादेवी गाउँपालिका-७ गरगट्टी गाउँको पश्चिम दानवनदी नजिकैको खेतमा अन्दाजी ३५ वर्षीय युवकको शव भेटिएको हो ।

जिल्ला प्रहरी कार्यालय रुपन्देहीका प्रहरी प्रमुख प्रवीण पोखरेलका अनुसार आगोले शरीर जलेको अवस्थामा हत्या गरिएको शव भेटिएपछि स्थानीयले प्रहरीलाई खबर गरेका थिए । नेपाल-भारत सीमा नजिकै बर्बर हत्या भएको अवस्थामा शव भेटिएपछि नेपालगञ्जबाट तालिम प्राप्त कुकर ल्याएर थप अनुसन्धान शुरु गरिएको छ ।

---

घटनास्थलमा प्लाष्टिकको पाइप र रगत पनि देखिएको प्रहरीले जनाएको छ । युवाको हत्या गरेपछि हत्यामा संलग्‍नहरु भारततिर भागेको हुन सक्‍ने अनुमान गरिएको छ । शवको पहिचान हुन सकेको छैन ।